Siglir tar il cuntegn

Header

video
Il Cussegl federal na prenda betg ulteriuras mesiras cunter la pandemia
Or da Telesguard dals 24.11.2021.
laschar ir
cuntegn

Cussegl federal Appell a la populaziun, però naginas novas mesiras naziunalas

Il Cussegl federal valitescha la situaziun actuala sco critica. El desista dentant da novas mesiras ed appellescha a la populaziun ed ils chantuns.

audio
Cussegl federal prenda naginas mesiras il mument
03:52 min, Actualitad dals 24.11.2021.
laschar ir. Durada: 03:52 minutas.
  • Il Cussegl federal desista en il mument da prender mesiras naziunalas.
  • Ils chantuns sez duain però prender mesiras per franar l'augment dals cas.
  • La populaziun duai sa tegnair vid las reglas actualas. Vul dir: purtar mascrina nua ch'igl è obligatoric, lavar mauns, tegnair distanza e sa laschar testar.

Dapi l'october crescha il dumber d'infecziuns cun il coronavirus puspè marcant, cunzunt er tar glieud pli giuvna. La mesemna ha l'Uffizi federal da sanadad annunzià 8'585 infecziuns novas cun il coronavirus. Er il dumber d'ospitalisaziuns crescha puspè - dentant betg uschè rasant. Il motiv per quest augment è la varianta delta, ch'è bler pli contagiusa. Il Cussegl federal sez desista dentant en il mument da prender mesiras actualas.

Situaziun critica

En vista a la situaziun actuala sin las staziuns da tgira intensiva e las grondas differenzas regiunalas è il Cussegl federal da l'avis ch'i na dovra naginas novas mesiras naziunalas. Tenor la regenza è la situaziun dentant critica ed ella vegnia probabel a sa pegiurar durant las proximas emnas.

Il Cussegl federal sa tegn vid la strategia: tar augments regiunals duain ils chantuns reagir, surprender responsabladad e prender mesiras. En il center è l'obligatori da mascrinas, in'obligatori da home-office e restricziuns da capacitads. Intgins chantuns, sco per exempel il chantun Grischun, han gia prendì mesiras.

video
Berset: «Nus stuain collavurar»
Or da News-Clip dals 24.11.2021.
laschar ir

«Ina strategia cun ristgs»

Il matg 2021 ha il Cussegl federal decis ensemen cun ils chantuns sia strategia da corona. Tenor quella è il Cussegl federal da l'avis che l'entira populaziun vegn insacura en contact cun il virus – protegida cun in vaccin u senza protecziun entras in'infecziun. En quest mument che l'entira populaziun sur 12 onns ha gì access a la vaccinaziun, sa drizzan las mesiras be pli a la protecziun dal sistem da sanadad.

Il Cussegl federal è cunscient che questa strategia porta ristgs. Igl è grev d'avair bleras infecziuns e tuttina evitar ch'ils ospitals vegnan surchargiads. Be sche las mesiras chantunalas na portan betg fritg ed il cumportament da la populaziun resta tuttina, vegn il Cussegl federal a trametter novas mesiras en consultaziun.

video
Berset: «Mesiras d'igiena èn pli impurtantas che mai»
Or da News-Clip dals 24.11.2021.
laschar ir

Dapli daners per cas da direzza

En pli ha il Cussegl federal decis d’augmentar il sustegn per cas da direzza. En il rom dal program per cas da direzza metta el a disposiziun ulteriurs 200 milliuns francs. Entras ils daners duain ils chantuns pudair sustegnair meglier las interpresas tenor ils desideris chantunals. L’ordinaziun areguard cas da direzza vegn adattada.

Ils daners vegnan or da la reserva da la Confederaziun. Els vegnan repartids tenor ina clav da repartiziun fixa als chantuns. Quella cumpiglia tranter auter il product interiur brut, la populaziun ed il dumber da locaziuns.

RTR novitads 16:00

Artitgels legids il pli savens

Scrollar a sanestra Scrollar a dretga