Siglir tar il cuntegn

Header

audio
Taskforce avertescha ch'i saja da frana las cifras d'infecziun
Or da Actualitad dals 23.11.2021.
laschar ir. Durada: 01:23 minutas.
cuntegn

Svilup da la pandemia Stadler: «Uss èsi da franar l'augment dals cas»

La situaziun epidemiologica en Svizra sa sviluppia uschia sco la situaziun en l'Austria, simplamain cun in retard da trais fin tschintg emnas. Quai è il facit da la taskforce scientifica federala.

Dapi mez november creschian ils cas da Sars-CoV-2 e sa dublegeschian aifer radund duas emnas. Era la cifra da las novas ospitalisaziuns creschia par radund 40% l'emna, concluda la taskforce en ses rapport actual.

L'occupaziun dals letgs sin las staziuns intensivas creschia per 20% l'emna. Occupads sajan per il mument 160 letgs sin las staziuns intensivas. Sche quest dumber cuntanschia 400 en Svizra, lura saja il potenzial exaust da las persunas ch'ins possia tractar sin las staziuns intensivas cun il persunal actual. Lura stuessian ins spustar tut las intervenziuns na-urgentas en l'entira Svizra.

Taskforce punctuescha impurtanza da la terza dosa

L'emprima finamira saja da reducir il dumber da las ospitalisaziuns cun renovar la protecziun tras il vaccin. Las ultimas emnas saja il dumber da persunas sur 80 onns che vegnian ospitalisadas creschì – quai che laschia concluder che la protecziun tras la vaccinaziun giaja enavos. La taskforce quinta da pudair evitar fin a 20'000 ospitalisaziuns tar persunas sur 70 onns, sch'ins fetschia la terza dosa dal vaccin, avant che las persunas sajan infectadas.

Sche nus vulain proteger ils ospitals, lura èsi da franar quest augment.
Autur: Tanja Stadler Taskforce federala

Cun la terza dosa quinta la taskforce era cun in effect tar las novas infecziuns. En media sis mais suenter la vaccinaziun dubla crodia la protecziun dad infecziuns sin 50%. La terza dosa restitueschia la protecziun d'infecziuns puspè sin radund 95%. Quai reduceschia da moda massiva il ristg da stuair ir en l'ospital suenter in'infecziun.

video
Stadler: «La terza dosa è fitg effectiva»
Or da News-Clip dals 23.11.2021.
laschar ir

Mesiras en scola èn essenzialas per las laschar avertas

Era uffants e giuvenils saja quai da proteger d'ina infecziun. Era sche andaments gravants d'ina infecziun cun Covid-19 èn rars tar giuvens ed uffants, lura pudessan ins uschia tuttina reducir il ristg da dar vinavant l'infecziun a persunas vulnerablas.

E per garantir l'andament regular a las scolas, saja quai impurtant da mantegnair e sa tegnair vid las mesiras da protecziun en las scolas. Testar regularmain, avair si la mascrina, mesiraziuns da CO₂ e ventilar regularmain las stanzas sajan cundiziun per mantegnair il mintgadi da scola.

RTR novitads

Artitgels legids il pli savens

Scrollar a sanestra Scrollar a dretga