Siglir tar il cuntegn

Header

video
En tschertas scolas grischunas èsi puspè da purtar mascrinas
Or da Telesguard dals 22.11.2021.
laschar ir
cuntegn

Corona sa derasa en scolas Obligatori da mascrinas a partir da terza classa

Il chantun Grischun introducescha puspè l'obligatori da mascrina a partir da la terza classa, quai a partir da damaun, mardi. Quai vala per las regiuns Plaun, Landquart, Moesa, Plessur, Partenz, Surselva e Viamala.

Il Grischun noda las pli autas cifras d'infecziuns da corona dapi l'entschatta da la pandemia. Pertutgadas èn sur tut persunas pli giuvnas. Tranter ils 8 ed ils 14 da november 2021 han ins nudà in terz dals cas tar persunas enfin 20 onns (325 da 973 cas). Perquai tutgia l'unda actuala uschè ferm las scolas. Per franar las infecziuns, ha la regenza decidì d'introducir l'obligatori da mascrinas en las regiuns pertutgadas il pli ferm. Quai scriva la regenza en ina communicaziun.

L'obligatori da mascrinas a partir da la terza classa enfin tar il stgalim superiur, vala a partir dals 23 da november, enfin las vacanzas da Nadal. Quai en las regiuns Plaun, Moesa, Landquart, Plessur, Partenz, Surselva e Viamala, en tuttas scolas publicas e privatas, sin l'entir areal da scola e per tuttas persunas. En quellas regiuns vegn er l'intensitad da testar augmentada. Uschia datti uss duas giadas ad emna tests empè da be ina giada. La fin december duai la situaziun vegnir valitada da nov.

audio
Puspè obligatori da mascras en scolas grischunas
03:39 min, Actualitad dals 22.11.2021.
laschar ir. Durada: 03:39 minutas.

Mantegnair instrucziun da preschientscha

L'obligatori da mascrinas ed ils tests duain gidar a mantegnair l'instrucziun da preschientscha en las scolas per uschia pudair garantir la furmaziun da scolaras e scolars en il chantun.

A persunas a las scolas professiunalas, centers da curs, en lavuratoris d'emprendissadis u scolas medias vegn cusseglià da purtar ina mascrina en l'intern dals bajetgs.

Ferm augment dapi vacanzas d'atun

Durant las ultimas emnas d'october han ins anc gì 33 pools da tests en classas ch'èn stads positivs e 25 tests positivs tar persunas singulas. Entaifer duas emnas èn questas cifras s'augmentadas sin 93 pools positivs e 122 persunas singulas testadas positivas. Pertutgà il pli ferm èn scolas primaras.

En la media a lunga vista hajan ins gì ina classa per emna en quarantina ed ha lura stuì ordinar instrucziun a distanza. En l'emna passada è l'instrucziun a distanza stada necessaria entaifer be dus dis, per 10 classas.

La 5avla unda sa derasia dentant fitg different en las regiuns. Fertant che las regiuns da Landquart, Plessur ed Imboden èn per il mument pertutgadas ferm, n'han las regiuns da l'Engiadina, la Bregaglia e Bernina strusch gì cas las ultimas emnas.

1'599 persunas en isolaziun

Er ordaifer las scolas sa mussia en il chantun in augment ferm dals cas positivs dapi las vacanzas d'atun. La media da 7 dis è s'augmentada entaifer in mais dad 11 cas per di is 12 d'october, sin 73 cas per di il 12 da november. Actualmain noda il Grischun 200 cas per di. 1'599 persunas èn en isolaziun. Il dumber da persunas en l'ospital è sa dublegià da 17 ils 18 d'october sin 37 ils 20 da november. Sin la staziun intensiva èn 5 da total 16 letgs occupads da persunas cun Covid-19. Per la gronda part èn quai persunas betg vaccinadas.

Varianta Delta e stagiun fraida

Las cifras autas cumpareglià cun undas precedentas, saja da declerar cun la varianta delta ch'è pli contagiusa e cun la stagiun fraida. La varianta delta è passa duas giadas uschè contagiusa sco la varianta originala ed il privel per ospitalisaziuns u ch'i po dar cas per l'intensiva saja er circa dubel uschè gronda, scriva la regenza. Plinavant è la concentraziun da virus pli auta en l'intern da stanzas. Er quai po manar ad in decurs da corona pli sever. Perquai resta il ventilar en stanzas gist uschè impurtant sco il purtar mascras. Giuadora è il privel dentant pli pitschen.

video
Scolas en il GR: Hotspots dal coronavirus
Or da RTR Social dals 22.11.2021.
laschar ir

RTR novitads 08:00

Artitgels legids il pli savens

Scrollar a sanestra Scrollar a dretga