La Svizra duai era spargnar voluntarmain 15% gas sco ils stadis commembers da l’UE han decis avant dacurt. Quai ha ditg la ministra d’energia Simonetta Sommaruga en l’emissiun da «10 vor 10» da SRF. Ils ministers e las ministras d’energia da l’UE èn sa cunvegnids ad in plan cuminaivel. Quel prevesa che mintgin dals 27 stadis commembers reducescha ses consum da gas voluntarmain per 15% tranter avust e mars.
Cussegl federal vegn a decider
Il Cussegl federal examineschia uss, sch’er la Svizra veglia spargnar tuttina bler. I giaja da mussar a l’UE ch’er la Svizra contribueschia sia part. Tar ils acturs da l’industria svizra saja il spargnar forza electrica gia tema per motivs da custs, uschia Sommaruga vinavant. En pli duai il Cussegl federal sclerì sch'el duai vegnir encunter a firmas che produceschan lura dapli Co2 pervia da la midada da gas sin ieli.
Ensemen cun l'economia e l'industria preparia la Confederaziun ina campagna publica per spargnar energia, uschia Sommaruga. Quella duai mussar, sco che mintgin e mintgina po spargnar sez en vista a l'atun e l'enviern.
