Siglir tar il cuntegn

Header

cuntegn

«Swissgas» Privel d'ina crisa d'energia è grond

La Svizra na saja betg pertscherta quant grond ch’il privel d’ina crisa d’energia saja. Quai ha ditg André Dosé, il schef da la societad gestiunaria da las raits da gas «Swissgas» en in’intervista cun la «NZZ».

El renviescha a furniziuns da gas tras la pipeline «Nord-Stream-1» che pudessan gia bainprest crudar davent. En pli avertescha Dosé che bunamain la mesadad da las ovras atomaras en Svizra sajan actualmain ord funcziun. Sut talas premissas dovria be fitg pauc per ch’i dettia ina mancanza d’energia durant l’enviern.

Ils problems tar il provediment da gas ed electricitad haja la Svizra per gronda part producì sezza. La strategia d'energia saja in'utopia e la guerra en l'Ucraina sforzia la Svizra da reponderar a moda dramatica. Ins stoppia examinar tut las pussaivladads per surmuntar la mancanza d'energia, davent dad extrair gas en Svizra, fin a la geotermia.

Sfidas en cas da crisas

Per Dosé na funcziunescha il sistem politic svizzer betg en cas da crisas. En quellas situaziuns na possian ins betg discutar mintga dumonda fin che tuts èn d'accord. El vesa parallelas tranter la mancanza d'energia ed il declin da la Swissair – André Dosé è stà schef da concern da la Swiss.

La branscha d'energia haja adina dapli bregia tar la finanziaziun da las fatschentas cun gas. Perquai ch'ils pretschs per gas èn uschè auts, pretendian furniturs extrem autas garanzias finanzialas per l'opziun da furnir dapli. La Confederaziun stoppia dar garanzias federals per segirar la furniziun da gas.

audio
Per tadlar: Las novitads da las 07:00
ord RTR Audio dals 07.07.2022.
laschar ir. Durada: 5 minutas 12 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga