Siglir tar il cuntegn

Header

audio
Mancanza da gas: Firma per asfalt ponderescha da midar sin ieli
Or da Actualitad dals 26.07.2022.
laschar ir. Durada: 2 minutas 30 Secundas.
cuntegn

Fatschenta d'asfalt Catram Midada da gas sin ieli fiss l'alternativa, però pli chara

I vegn supponi ch'i savessi gia dar proxim enviern ina mancanza da gas. In'interpresa grischuna ch'è dependenta da gas è la Catram SA. Ella producescha asfalt che vegn duvrà per bajegiar vias. Quel sto avair in'auta temperatura e per stgaudar, dovran els gas. Quai pudess dentant midar.

L'interpresa Catram dovra material primar (sco crapella) e material da recicladi (sco restanzas da vias ch'ins ha stuì meglierar). Quai vegn stgaudà sin 150 enfin 180 grads, uschia ch'ils camiuns pon transportar il material chaud sin via. La Catram SA ha quatter maschinas che produceschan asfalt – e 3 dad ellas dovran gas. En cas che l'interpresa vegniss sfurzada da spargnar gas, stuessan els midar la producziun:

2 da 3 maschinas pudessan nus midar da gas sin ieli. Nus avain salvà l'infrastructura, cura che nus avain midà avant 15 onns dad ieli sin gas.
Autur: Henry Mazzoni mainafatschenta Catram SA
In bajaetg grisch cun scet si Catram en colur oranscha. Davant vesan ins material da crappa.
Legenda: L'interpresa grischuna Catram producescha asfalt a Vaz Sut, a La Punt/Reichenau ed a Samedan. MAD

Pli pauc e pli char

Ina tala midada duvrassi dentant temps. Els na possian betg far quai durant che las maschinas sajan en funcziun. Plinavant na pudessan els betg producir tantas sorts asfalt ed el vegniss era pli char. D'ina vart perquai che l'ieli è pli char ch'il gas, e da l'autra vart stuess ina maschina star airi. I na saja numnadamain betg pussibel da midar la producziun da quella sin ieli, di Henry Mazzoni.

Preparads per la midada

Tgi che surprendessia lura quels custs supplementars, gliez na saja anc betg cler. Ina pussaivladad fiss natiralmain la clientella. Dentant spera il mainafatschenta ch'era la Confederaziun sa gidassia en uschè ina situaziun. Era sche Catram producescha quasi tut ses asfalt ils mais pli chauds da l'onn, sajan els preparads sin ina midada. La fatschenta haja fatg pliras provas ed emplenì ils tancs dad ieli. Malgrà quellas preparaziuns spera Henry Mazzoni ch'i dettia avunda gas per pudair producir vinavant l'asfalt sco fin ussa.

RTR actualitad 11:00

Artitgels legids il pli savens

Scrollar a sanestra Scrollar a dretga