Siglir tar il cuntegn

Header

Navigaziun

Cumbat electoral da videos.
Legenda: Cumbat electoral da videos. RTR
cuntegn

Chantun Hollywood en il cumbat electoral

Sche las partidas cumbattan per vuschs, sche na fan ellas quai ozendi betg pli mo giu da placats ed inserats; na, ellas fan er en il Grischun videos d'elecziun. Guardar quels videos po esser fitg divertaivel.

Il pli consequent part al trend da video en il cumbat electoral fa la Partida liberaldemocrata (PLD) che ha fatg 18 videos curts cun ils 15 candidats da sias 3 glistas. Er ils Socialdemocrats (PS) han fatg 6 videos d'elecziun, quai cun tut il candidats da la glista principala. In video in zic pli lung ha la giuvna Partida populara dal Grischun (PPS) mess sin ses canal da youtube.

In zic sco Hollywood

La qualitad dals videos variescha da parita quasi professiunala (intgins videos da la PLD) fin ad ina spezia da home-videos en ils quals l’illuminaziun manglusa gioga la rolla principala. Sper ils pitschens purtrets da candidats ha la PLD era fatg 3 pitschens filmins da reclama. In da quels è in "making of" da las fotografias da la campagna electorala. Accumpagnà da musica bumbastica à la Hollywood vegn mussà co che las candidatas ed ils candidats èn vegnids fotografads dad in fotograf professiunal.

In filmin da youtube in zic pli lung è quel da la PPS giuvna. En quel vegn mussà co ch’i saja da votar - tenor la PPS giuvna - endretg, e tge ch’i saja da far cun ils cedels d'elecziun da las autras partidas. Interessant: Sco exempel tge candidat ch'ins pudess, sper quels da la PPS giuvna, er anc sustegnair vegn mussà unicamain Magdalena Martullo-Blocher.

Pigna gioga rolla gronda

Mo la PLD, la PS ed ils giuvens da la PPS paran d'avair nizzegià il medium video per il cumbat electoral. Da las autras partidas na chattan ins - era cun tschertgar pli ditg - nagins resultats actuals sin il portal da video Youtube. Tge effect ch'ils filmins da youtube han sin il cumbat electoral, n’è natiralmain anc betg d’eruir avant las elecziuns dals 18 d'october. Forsa ch’i vegn a sa mussar che videos semiprofessiunals han gist il medem effect sco videos en ils quals ins guarda pli fitg sin paraids e pignas ch'en la culissa.