Silvio Lebrument, il mainafatschenta da la chasa da medias Südostschweiz (Somedia), aveva annunzià gia il schaner, suenter avair pers la concessiun per il Radio Südostschweiz, da betg semplamain acceptar la decisiun dal BAKOM. Anzi, mabain d'examinar tut las pussaivladads giuridicas ed era duvrar quellas. Ussa èsi cler: La Somedia fa recurs cunter la decisiun da l'uffizi federal da communicaziun (BAKOM) da dar la concessiun da radio per la regiun da la Svizra Sidorientala e Glaruna a Radio Apin - il radio planisà dal Turitgais Roger Schawinski e dal Grischun Stefan Bühler . Lebrument ha confermà la decisiun da far recurs envers RTR. Sco quai che Lebrument di, hajan els constatà intginas irregularitads ed era anc chattà divers arguments cunter. El craja perquai d'avair bunas schanzas e d'avair success cun il recurs. En vista al proceder na possia el però il mument betg dir dapli.
Il BAKOM aveva surdà la concessiun da radio per ils onns 2025 fin 2034 a Radio Alpin cun l'argument che Radio Alpin haja ademplì meglier ils criteris. Spezialmain tar criteris per l'incumbensa d'infurmaziun, sco per exempel da cuvrir il territori da provediment u da mussar raschuns e connexs, haja la candidatura da Radio Alpin persvadì meglier. Però era cun ademplir l'incumbensa da cultura haja la candidatura da Schawinski fatg dapli puncts. Tenor il BAKOM avess Radio Alpin era lura survegnì la concessiun sche las annunzias fissan stadas equivalentas. La lescha da radio e televisiun prescriva ch'en in tal cas saja da preferir ils candidats ch'enritgeschian il pli fitg la varietad d'opiniuns e da purschidas.
Tge consequenza ha la mancanza d'ina concessiun
Avrir la box
Serrar la box
Ils purschiders che perdan la concessiun pon bain cuntinuar, na survegnan dentant nagins daners pli da la Confederaziun. En blers cas è quai privlus per l'existenza. Cunter las decisiuns dal Bakom po vegnir fatg recurs entaifer 30 dis tar il Tribunal administrativ federal. Sche quel na decida betg definitiv fin la fin dal 2024, dat la Confederaziun concessiuns provisoricas.
Da l'autra vart è ina concessiun era liada vid ina incumbensa da la Confederaziun. Senza concessiun pudess la Südostschweiz er daventar pli libra en ils temas ch'ella vul tractar.
La finamira da Schawinski e da Bühler è da rumper il monopol da medias che la Somedia ha tenor els en la regiun. La Somedia distribuescha gasettas, ha emetturs da radio e televisiun, sco era ina pagina d'internet.
Schawinski e Bühler ston cumprovar fin la fin da settember 2024 ch'il Radio Alpin è fundà. Concret ston els inoltrar in extracvt dal register da commerzi tar il Departament federal per ambient, traffic, energia e communicaziun.
Concessiun per Radio Alpin: Il proxim pass dal BAKOM
Avrir la box
Serrar la box
La procedura
Suenter la decisiun dal Departament federal per ambient, traffic, energia e communicaziun (UVEK) dals 11 da schaner 2024 da surdar la concessiun per la regiun Grischun ed Glaruna a Radio Alpin han ils responsabels dal Radio Südostschweiz gì temp 30 dis per inoltrar in recurs tar il Tribunal administrativ federal a Son Gagl cunter questa decisiun. Sin quai survegnan era ils responsabels dal Radio Alpin la pussaivladad da preschentar lur arguments al tribunal. Sin questa basa decida lura il Tribunal administrativ federal. Fin l'emprima decisiun cun vigur legala poi durar in onn.
Questa decisiun na po betg vegnir tratga vinavant al Tribunal federal a Losanna. La Lescha federala davart il Tribunal federal regla en l' art. 83 las excepziuns d'ina cuntinuaziun al Tribunal federal, scriva il Bakom sin dumonda. Tenor questa lescha n'è in recurs al Tribunal federal betg pussaivel en cas da decisiuns dal Tribunal administrativ federal en il sectur da radio e televisiun, sche concessiuns eran l'object d'ina publicaziun publica. Uschia duai vegnir cuntanschì che dispitas vegnian spert eliminadas, perquai che las prestaziuns a favur da la publicitad na pon uschiglio betg vegnir furnidas a temp.
Evitar ina largia
Sco quai che l’Uffizi federal da communicaziun (Bakom) ha confirmà veglian els evitar ina largia da provediment en la regiun GR ed GL. Sche la decisiun finala en la dumonda tgi che duai retschaiver la concessiun da radio n’è betg crudada enfin la fin da quest onn, cura che la concessiun actuala scada, lura haja la SOMedia la pussaivladad da far la dumonda per ina concessiun transitorica. Anc betg cler saja dentant, di il Bakom, quants daners che stettian lura a disposiziun per il Radio Südostschweiz.
