Las ovras electricas da Turitg EWZ han vulì investir passa 100 milliuns francs en in project solar da circa 65 hectaras. Quai avess correspundì ad ina surfatscha da circa 93 plazzas da ballape. 11'000 maisas solaras cun circa 90'000 moduls solars fissan i stads.
Ils moduls avessan furnì circa 66 uras gigawatt electricitad per onn, avunda energia per radund 20'000 chasadas. A la radunanza communala il glindesdi saira ha ina maioritad da 68% dentant refusà l'ovra solara dasper il territori da skis Savognin/Radons.
Ultra da la decisiun da principi da negar il dretg da realisar in implant cun 177 per e 378 vuschs encunter, han er 370 votà cunter il dretg da construcziun da l'ovra sin las surfatschas Bleis/Padasch (525'000 m²) e Cartas (140'000 m²). Per credits da sanar vias e per la vendita d'ina parcella hai mintgamai dà radund 400 vuschs per e strusch vuschs encunter.
Avant la radunanza communala glindesdi saira ha la suprastanza communala s'exprimì per l'ovra. Ella dettia entradas supplementaras, en il cas ideal 660'000, minimalmain 400'000 francs per onn. Vitiers fissan participaziuns da gudogn e taglias sin immobiglias vegnidas.
Critichers sco Luzi Thomann, president dal cussegl administrativ da Turissem Savognin Bivio Alvra SA, han fatg valair ch'ina reducziun d'entradas en il turissem possian surpassar las entradas supplementaras. La suprastanza avess vulì nizzegiar ils daners per reducir il pe da taglia e promover il turissem.
L'EWZ deplorescha la decisiun. Ella haja resguardà ils giavischs da tut las partidas e fatg midadas per pudair realisar il project. «Deplorablamain n'èsi betg gartegià a nus da persvader la populaziun dals avantatgs e da l'urgenza dal project», vegn il manader da la fatschenta d'energia Philippe Heinzer cità en ina communicaziun. L'EWZ termineschia las lavurs da projectaziun.
