La populaziun da Surses decida sch'ella vul laschar installar la EWZ, l'Ovra electrica da la citad da Turitg, 93'000 moduls solars en la Val Nandro u betg. La EWZ quinta cunquai che l'implant produciss 66 uras gigawatt ad onn. Quai fiss energia per passa 14'000 chasadas.
Quants raps che la vischnanca da Surses faschess en quella fatschenta n'è ditg betg stà cler. La vischnanca ha entant publitgà quella infurmaziun: I fiss in rap per ura kilowatt che vegn producida. Vul dir che la vischnanca faschess 660'000 francs gudogn sche l'implant produciss era propi sco planisà.
Critica da pliras varts
Tuttina datti critica. Per l'ina dad organisaziuns d'ambient – e da l'autra da turistichers. La Pro Natura Grischun tema per la biodiversitad en quel territori. Ella na vesa era betg propi il senn da tals implants gigantics – sche implants solars sin ils tetgs avessan il potenzial da producir passa 60 uras terrawatt en Svizra – quai che saja dapli energia che la Svizra dovra per onn.
Er ils turistichers argumenteschan cun la cuntrada ch'è la fin finala lur grond chapital. Luzi Thomann – president dal cussegl administrativ da «Turissem Savognin Bivio Alvra SA» na chatta la Val Nandro nagina buna tscherna. Ella saja in lieu turistic impurtant. L'implant faschess cunquai donn a differents affars che hajan investì blers raps. Uschia na giaja il quint betg si per el – era sche la vischnanca survegniss grazia a l'implant mintg'onn 660'000 francs.
