La vischnanca da Surses na prolunghescha betg la concessiun dal dretg da las auas per las ovras idraulicas Tinizong e Nandro cun las Ovras electricas da Turitg EWZ. Il suveran ha ditg cun 70,4% da las vuschs cleramain Na a la prolungaziun. Uschia sa tegna la vischnanca avert tut las opziuns en chaussa. La concessiun actuala scada il 2035.
La vischnanca da Surses aveva proponì da betg prolungar la concessiun dal dretg da las auas per las ovras idraulicas Tinizong e Nandro. Quella proposta avevan las Ovras electricas da Turitg fatg l'avrigl 2020. En il messadi ha la vischnanca punctuà ch'i na sa tractia betg d'ina dumonda per ubain encunter l'EWZ, mabain per tegnair avert tut las opziuns tar tractativas davart la concessiun.
Nus deplorain questa decisiun, beneventain però ch'ina prolungaziun è ina da las trais opziuns che la vischnanca da Surses menziuna en ses messadi.
La concessiun actuala che las EWZ han da Surses per nizzegiar las auas en las ovras Tinizong e Nandro scada numnadamain ils 31 da matg 2035. Tenor las leschas per ils dretgs d'aua ston las vischnancas decider davart prolungar ina concessiun enfin il pli tard 10 onns avant ch'ella scada. Cun la decisiun actuala ha Surses uss peda per tractativas e silsuenter decider ina da las variantas:
- sviluppar in'atgna schliaziun ensemen cun il chantun Grischun
- far ina nova concessiun cun las Ovras electricas da Turitg
- far ina nova concessiun cun in nov concessiunari
Nova chasa da scola Gravas cun halla da parcar
Ditg Gea han ils da Surses percunter al credit da 21,9 milliuns francs per ina nova chasa da scola a Savognin cun 66,3% da las vuschs. Er approvà ha il suveran il credit supplementar da bun dus milliuns francs per ina halla da parcar sut il plaz da pausa.
Cun il nov bajetg possian ins schliar deficits en l'infrastructura da la scola – però era la problematica dal radon en la scola actuala.
