En il terz gieu da la seria da «best of five» hai finalmain funcziunà per ils Partenzers. A chasa sin il glatsch da Grüsch hani gudagnà cunter l'EHC Wetzikon cun 5:4. Suenter in emprim terz en favur dal HC Partenz Signuradi (2:1) hani stuì ceder en il segund terz als Turitgais (0:1). En l'ultim terz hai lura dà 5 gols. Il 5avel gol per il Partenz Signuradi ha Nico Casanova fatg en la 57avla minuta.
Uschia ha il HC Partenz Signuradi pudì mantegnair la schanza da sa qualifitgar per il final en l'emprima liga – e sto ussa gudagnar tut ils gieus. Il proxim gieu è sonda a Wetzikon.
Era il segund gieu è stà pers
La segunda partida cunter Wetzikon aveva il club da hockey Partenz-Signuradi anc pers – ordaifer cun 1:3. Sin il retard da dus gols suenter 21 minutas, avevan ils Grischuns pudì reagir cun far il 1:2 paucas minutas pli tard. En il davos terz ha Wetzikon dentant augmentà sin 1:3, e l'emprova da prender or il goli per in sisavel giugader n'aveva purtà nagut.
Per cumenzar pers a chasa
Cumenzà ha il playoff mezfinal mal per il club da hockey Partenz-Signuradi. A chasa ha il club dal Partenz pers cunter il terz da la qualificaziun Wetzikon cun 2:4. Suenter l'emprim terz era Partenz-Signuradi gia cun dus gols en retard. En il davos terz èsi anc ina giada gartegià als Grischuns da scursanir al 2:3. Ina minuta avant la fin da la partida ha Wetzikon dentant fatg tut cler, cun marcar in ulteriur gol al 2:4.
Dübendorf gia en il final
En il segund mezfinal è la decisiun gia crudada cun la terza partida. Il club da hockey da Dübendorf ha era gudagnà il terz duel cunter Burgdorf, quai cun 4:3 suenter prolungaziun. Gia las emprimas duas partidas èn stadas pari suenter il temp regular – e Dübendorf ha sinaquai anc mintgamai fatg il gol decisiv en la prolungaziun. Cunquai ha Dübendorf gudagnà questa seria cun 3:0, e frunta en il final u sin Partenz-Signuradi u sin Wetzikon.
