Ils ustiers svizzers sa lamentan da svieutas sbassantas. Las raschuns èn tenor l’organisaziun da branscha Gastrosuisse il ferm franc, la surregulaziun e la concurrenza da portals da reservaziun online. Uss duai ina maisa radunda metter en urden la branscha.
Inscunter suprem da tuts partenaris da la branscha
A la conferenza annuala da la Gastrosuisse ha il president Casimir Plazer accentuà la situaziun difficila che regia en regiuns alpinas e ruralas.
Da quests sindroms è er pertutgà il chantun Grischun, en il qual la branscha gastronomica è in'impurtanta pitga economica.
Per Plazer n’èsi betg chapibel ch’ils acturs politics na fan nagut, cura che la dumonda en regiuns alpinas ord tscherts pajais sa sbassa per radund 40 pertschient. Il president pretenda ord quest motiv in inscunter che duai sustegnair il turissem da regiuns alpinas.
Auts custs e regulaziuns
L’onn passà ha la populaziun svizra dà ora 22,4 milliardas francs per tschaveras e bavrondas ordlonder. Sco Gastrosuisse scriva, èn quai 1,1 pertschient damain ch’il 2014. Sulet il turissem gastronomic haja purtà quatter milliardas francs a l’exteriur vischinant.
Tenor Gastrosuisse è in problem da la branscha ils auts supplements da la Svizra, ils quals ils importaders e vendiders da l’exteriur mettan a quint als ustiers indigens. Il resultat è in augment dals custs aifer la branscha.
L’associaziun vul per quest motiv anc il 2016 lantschar in’iniziativa cun il titel «Stop a l’insla d’auts pretschs – per pretschs gists».
Critica envers autoritads
Gastosuisse crititgescha en ses messadi er las autoritads. L’uffizi per la segirezza da victualias haja inchargià a las interpresas pitschnas e mesaunas bleras regulaziuns cun il pachet «Projekt Largo».
Er la Cumissiun da concurrenza survegn critica: Ella ageschia a moda tardivanta en il cumbat cunter garanzias dal meglier pretsch e cunter portals da reservaziun online sco Booking.com, HRS u Expedia.
RR novitads 12:00
