Cun il di da sonda vegn la Svizra almain statisticamain provedida cun nutriment da l'exteriur. L'agricultura svizra producescha be 52% da tut las mangiativas che vegnan consumadas tar nus aifer in onn.
L'Uniun purila svizra nizzegia quest «Food Overshoot Day» per far reclama per las mangiativas indigenas. Quellas fetschian main donn a l'ambient che l'import da l'exteriur. Er per la segirezza alimentara saja ina ferma producziun indigena d'impurtanza. La Confederaziun ha publitgà il december passà la statistica actuala davart il tema ed ha discurrì dad in trend a val tar l'alimentaziun cun atgna producziun en Svizra.
Ils problems cun la dependenza da l'exteriur
Las davosas crisas sco la guerra en l'Ucraina mussian, quant fragilas che las chadainas da furniziun sajan. Gia pitschens disturbis possian periclitar il provediment da l’entira populaziun, avertescha l'uniun purila. Las raschuns sajan d'ina vart ch'i dettia adina pli pauc terren agricul pervia da surbajegiadas, dentant er pervia dad erosiun u er mancanza d'aua. Da l'autra vart creschia la populaziun mundiala.
