La punt existenta sto vegnir stgarpada giu e remplazzada. Per pudair far questas lavurs, ha il chantun construì gist daspera ina punt da sviament.
Terren problematic
Per pudair fundar la punt avunda, datti pitgas da betun che tanschan 25 meters en la terra.
Nus essan qua en ina regiun nua ch’igl aveva pli baud in lai, quai en consequenza da la crudada dal crap da Flem. Ils sediments dal lai d’antruras furman uss il terren. Per purtar la punt stuain nus surmuntar quella zona ed ir cun il fundament enfin sin terren franc.
Dasper remplazzar la punt sanescha il chantun era grad la via chantunala sin ina lunghezza da 700 meters. Sin quest tschancun datti duas fermadas per ils autos da posta e duas inslas per quietar il traffic.
Ils custs per l’entira sanaziun èn calculads cun sis milliuns francs. La nova punt vegn surdada il fanadur 2021 al traffic.