Siglir tar il cuntegn
Inhalt

Grischun Somedia: Surpigliada u focus regiunal?

La chasa editura grischuna na chatta nagin partenari. La soluziun pudess esser in focus regiunal u da vender las gasettas a la concurrenza.

Gasettas da la Südostschweiz, il Bündner Tagblatt e la Quotidiana.
Legenda: Quant ditg restan la Südostschweiz, il Bündner Tagblatt e la Quotidiana anc independentas? Keystone

Da gudagnar daners cun schurnalissem saja vegnì adina pli grev ils davos onns. Il motiv saja l'internet, di Manuel Puppis che lavura a l'universitad da Friburg ed è expert per il sistem da medias. Adina dapli lecturas e lecturs tschertgian ed chattian las infurmaziuns e las novitads tar autras funtaunas, sin Facebook per exempel. E là nua ch'ils clients sajan, là giajan era ils daners da la reclama.

Cun quella sfida èn tut las chasas edituras confruntadas. Autras pussaivladads che da nizzegiar sinergias, s’unir e da spargnar daners na datti il mument betg.
Autur: Manuel PuppisExpert da medias

Betg chattà partenari

Quai ha era la Somedia realisà e tschertga perquai gia dapi in mument partenaris. La fin da l’onn passà ha ella annunzià da vulair collavurar cun la «Basler Zeitung». Trais mais pli tard era l'amur dentant gia a fin, ed igl aveva num ch’i na dettia tuttina nagina collavuraziun. Per Manuel Puppis èsi cler che la Somedia sa chatta en ina situaziun difficila. El vesa dentant anc l'in u l'auter eventual partenadi per la chasa da medias grischuna. Per exempel la Tamedia u era il joint venture da la AZ-Medien e la NZZ. Sch'i vegniss ad ina tala collavuraziun, fiss la Somedia dentant cleramain en la posiziun pli flaivla.

Candidata da surpigliada?

La Somedia è, cun sia derasaziun dal Grischun enfin al Lai da Turitg ed in dumber da lecturs da 170'000, dentant era ina partenaria interessanta. Perquai pudessi era anc dar in'autra pussaivladad, di Puppis, numnadamain ch'ella vegn cumprada.

Concentraziun sin regiun

Quai na para per il mument dentant betg d'esser il cas. In'autra strategia fiss «concentrar las forzas», vul dir metter in focus regiunal. Las infurmaziuns per temas naziunals pudess la Somedia lura retrair via agentura.

E sch'ins resguarda las decisiuns dals ultims mais da la Somedia, para quai er d'esser l'alternativa, per la quala la Somedia è sa decidida. Uschia ha la Somedia per exempel decidì da desister en futur sin ina atgna redacziun en Chasa federala. Per Puppis è quai in indizi che la Somedia veglia sa concentrar sin il martgà regiunal. Quai avess era avantatgs pertutgant la reclama e cun quai ils daners.

La reclama regiunala e locala funcziunescha anc adina meglier che la reclama naziunala ed internaziunala, perquai che las interpresas regiunalas e localas èn pli dependentas da pudair inserar en la regiun che tar la reclama naziunala. Quella è ida pli fitg en l’internet.
Autur: Manuel PuppisExpert da medias

RR actualitad 11:00