Siglir tar il cuntegn

Header

video
Il manader da l'uffizi da chatscha ha prendì posiziun envers RTR.
Or da sil punct dals 25.07.2022.
laschar ir. Durada: 59 Secundas.
cuntegn

Puschlav Luf è s'avischinà ad ina persuna

Sin l'Alp Grüm en il Puschlav hai dà la sonda endamaun in inscunter tranter in luf ed ina persuna. Il luf haja sgrignì si per la persuna suenter ch'el era suandà a quella per intginas minutas. Quai communitgescha l'Uffizi chantunal da chatscha e pestga. La persuna pertutgada era sin viadi persula e senza in chaun. Adrian Arquint, il manader da l'uffizi da chatscha ha prendì posiziun envers RTR.

audio
Adrian Arquint discurra da dapli activitads da lufs en il Puschlav
ord RTR Audio dals 24.07.2022.
laschar ir. Durada: 24 Secundas.

Uss erueschan ils organs da surveglianza da chatscha daco ch'il luf è s'avischinà a la persuna a moda aggressiva.

Jau speresch propi che quai resta in cas singul.
Autur: Adrian Arquint manader da l'Uffizi da chatscha grischun

Sajettar el mument nagina opziun

Il mument na discurra Adrian Arquint anc betg d’ina situaziun intolerabla u d'ina escalaziun. Per gliez saja memia baud. Avant che sajettar il luf stoppia esser cumprova che quel saja in privel per ils umans. Quai na saja suenter sulet in inscunter betg il cas. Era il diever da la clausula generala da polizia è il mument nagina opziun.

La basa legala per sajettar quest luf n'e il mument betg avant maun.
Autur: Adrian Arquint manader da l'Uffizi da chatscha grischun
audio
Co è quest inscunter da valitar?
ord Actualitad dals 25.07.2022.
laschar ir. Durada: 5 minutas 26 Secundas.

Adina dapli lufs

Enfin uss èsi gia enconuschent ch'ils trieps da la Moesa, quel a San Bernardino ed il triep da Stagias han gia luffets. Adrian Arquint quinta che l’Uffizi da chatscha sa enfin la fin d’avust tge trieps ch'èn sa multiplitgads e nua ch‘i dat forsa novs trieps. Il dumber da lufs s’augmenta mintga onn per circa 30%. Senza regulaziun avess il chantun Grischun uschia en 5 onns in dumber da varga 150 lufs.

Insacura ston ins definir ina cifra maximala quants lufs ch’ins vul acceptar.
Autur: Adrian Arquint manader da l'Uffizi da chatscha grischun

En il Puschlav ha l'Uffizi da chatscha gia pudì identifitgar quest onn dus differents lufs.

Co sa cumportar envers il luf?

Avrir la box Serrar la box

Tgi ch'entaupa in luf duai

  • star airi e restar ruassaivel, pertge sch'il luf remartga in uman, s'allontanescha el normalmain. Sch'il luf na fugia betg, alura èsi bun da sa far attent cun ferma vusch e da sa retrair plaunsieu
  • betg s'avischinar al luf – era betg per far fotografias
  • betg suandar in luf
  • guntgir lieus nua ch'ils lufs han pitschens
  • betg pavlar lufs
  • dustar mangiativas e rument p.ex. suenter grillar per ch'il luf na vegnia betg attratg
  • tegnair sut controlla il chaun ubain avair el vid la corda
  • annunziar a la guardiaselvaschina lufs cun cumportament problematic, selvaschina stgarpada ubain donns e conflicts

Funtauna: Uffizi da chatscha dal Grischun

RTR novitads 06:00

Artitgels legids il pli savens

Scrollar a sanestra Scrollar a dretga