Siglir tar il cuntegn
cuntegn

Chantun Dischoccupaziun l'october: GR 1,7% – CH 3,2%

En il Grischun èn 1’867 persunas stadas l'october senza lavur. Quai èn 488 dapli ch'il settember e correspunda ad ina quota da dischoccupaziun dad 1,7%.

Legenda:
Dumber da dischoccupads: Cliccar sin ils onns per activar e deactivar las lingias per cumparegliar la dischoccupaziun da differents onns. Cifras da l'Uffizi d'industria, mastergn e lavur GR (2002-2016; stan 10-10-2016)

Tenor l'Uffizi per industria, mastergn e lavur dal Grischun è quest augment d'attribuir a la fin da la stagiun da stad/atun en il turissem.

Cun 805 ils pli blers dischoccupads en la gastronomia

Il pli grond dumber da dischoccupads è vegnì registrà en la gastronomia cun 805, seguì da la branscha da fabrica cun 132 e dal sectur da sanadad e socialesser cun 126.

3 interpresas cun lavur curta en Grischun

L'october han trais interpresas cun 41 lavurers introducì lavur curta en il Grischun. En il settember eran quai 3 interpresas cun 43 lavurers, communitgescha l’uffizi. Cifras actualas effectivas na dettia dentant betg cun quai che las cifras da las singulas interpresas arrivan cun retard temporal tar las chaschas da dischoccupads.

Cun 3,2% stabilisaziun da quota da dischoccupaziun en Svizra

La situaziun sin il martgà da lavur en Svizra è sa midada mo pauc il mais d'october. La quota da dischoccupaziun è restada sin 3,2% sco quai ch’il secretariat statal per economia Seco communitgescha. Al cumenzament da l’onn, en schaner e favrer 2016, era ella anc tar 3,6%.

144’531 persunas eran annunziadas l'october tar ils centers per intermediaziun da lavur RAV. Il dumber da las plazzas avertas annunziadas al RAV è sa sminuì levet sin stgars sut 10’910.

L'avust 2016 han passa 3’500 persunas pers lur dretg sin daners da dischoccupaziun.