Dapli dischoccupads l’avust

L'avust 2016 è la quota da dischoccupaziun creschida sin 3,2%, ha communitgà il secretariat statal per l'economia SECO. Tut en tut eran la fin d’avust 142’858 persunas senza lavur, 3’548 dapli ch’il mais avant.

Persuna che entra tar la RAV.

Legenda da maletgs: Passa 200’000 persunas eran vid tschertgar lavur il davos mais. Keystone

Cunquai è la situaziun sin il martgà da lavur svizzer sa pegiurà in zic. Il fanadur passà era la quota da dischoccupaziun anc tar 3,1%. Cumpareglià cun l'avust da l'onn passà è questa quota creschida per 4,3% u per 5’875 persunas.

Dischoccupaziun da giuvenils

La dischoccupaziun da giuvenils tranter 15 e 24 onns è creschida per 3’533 persunas (+20,7%) sin 20’640. En cumparegliaziun cun l’avust 2015 è quai in augment da 81 persunas (+0,4%).

Persunas che tschertgan lavur

En tut èn vegnidas registradas l’avust 201’989 persunas che tschertgan lavur, 2’642 persunas dapli ch’il fanadur. Cumpareglià cun l’avust 2015 è questa cifra creschida per 9’320 persunas (+4,8%).

Pli paucs dischoccupads en il Grischun

L'avust ha il chantun Grischun registrà 1'300 persunas senza lavur. Quai èn bunamain 70 persunas pli pauc ch'il fanadur. La quota da dischoccupaziun è 1,2%. Las pli bleras persunas dischoccupadas datti en la gastronomia.

gr Dumber da dischoccupads: Cliccar sin ils onns per activar e deactivar las lingias per cumparegliar la dischoccupaziun da differents onns.

RR novitads 08:00