Siglir tar il cuntegn
Inhalt

Chantun A la tschertga da daners per La Quotidiana

La Lia Rumantscha ha surpiglià il timun per ponderar co vinavant cun la gasetta La Quotidiana. Quai saja stà il consens da l'ultima maisa radunda cun medias ed organisaziuns rumantschas, di il president Johannes Flury. El sa metta uss a la tschertga da daners.

Legende: Video La Lia Rumantscha surpiglia la bitgetta abspielen. Laufzeit 03:20 Minuten.
Or da Telesguard dals 16.05.2017.

En emprima lingia veglia la Lia Rumantscha prolungar il temp da La Quotidiana. Quai vul dir: Garantir ch'ella vegn edida per in mez u in onn pli ditg. La chasa editura Somedia aveva annunzià d'edir la gasetta be pli enfin la fin da l'onn 2017.

Sperar sin daners da chantun e Confederaziun

Johannes Flury spera sin sustegn finanzial dal chantun Grischun e da l'Uffizi federal da cultura (BAK). El accentuescha dentant ch'i giaja be per in agid ad interim – enfin ch'in nov project per ina gasetta rumantscha saja pront. En quest cas duessi esser pussaivel da survegnir daners a basa da la lescha da linguas, di il president da la Lia Rumantscha envers RTR. El haja era survegnì las cifras concretas da la Somedia. La Quotidiana fetschia deficits – quant gronds n'ha Johannes Flury dentant betg tradì.

A curta vista sperain sin agid da chantun e Confederaziun – a lunga vista dentant n'èsi betg l'incumbensa dal maun public d'edir ina gasetta rumantscha.
Autur: Johannes FluryPresident da la Lia Rumantscha

Co che la gasetta da l'avegnir duai vesair ora, è anc intschert. E dependa fitg da las Rumantschas e dals Rumantschs: La Lia Rumantscha vul savair da la populaziun tge giavischs e basegns ch'ella haja per ina gasetta.

Sceptic vers ina gasetta gratuita

Johannes Flury è sceptic envers l'idea d'ina gasetta gratuita, sco quai che la Pro Svizra Rumantscha ha proponì. Gratuit na saja nagut – insatgi stoppia tuttina pajar la gasetta. Plinavant na vuless el betg periclitar la Posta Ladina – ina purschida che vegnia stimada en l'Engiadina.

RR actualitad 12:00