La Quotidiana scrivia deficits en l’autezza da sis cifras, di Silvio Lebrument il mainafatschenta tar Somedia. La culpa sajan damain reclamas e pli paucs abunents. Perquai less la Somedia surdar la redacziun ed ils custs da 300’000 francs a l’Agentura da Novitads Rumantscha.
Il schaner pudessi esser a fin
Sco fatschenta privata saja la Somedia visada sin products che rendian. Perquai fiss ella pronta da vinavant squitschar «La Quotidiana» e persuenter salvar las entradas da reclama e dals abunents.
En cas che l’ANR na saja betg pronta da surpigliar la redacziun e custs ed il chantun e la Confederaziun na dettian betg ils 300’000 francs dapli a l’ANR, stoppian ins smetter cun la gasetta enfin la fin da l’onn, di Silvio Lebrument. Èn ils 300'000 francs èn cumpridas las pajas dal schefredactur e dal correctorat.
Surpraisa per l'ANR
L’Agentura da Novitads Rumantscha na saja betg qua per finanziar gasettas, di Martin Gabriel, president dal cussegl da fundaziun. L’incumbensa saja da porscher texts schurnalistics a tuttas medias rumantschas. Insumma saja el surstà; la fin finala haja Hanspeter Lebrument anc discurrì avant curt d'in project cun tut las medias rumantschas. «La Quotidiana» chaschuni deficits, perquai saja ina soluziun sperta necessaria.
L'ANR n'è betg qua per finanziar gasettas.
Ina tala soluziun haja paucas schanzas, di Martin Gabriel. La fin finala saja la cunvegna da prestaziun cun il chantun gist ida en vigur e cuzzia anc fin il 2020. Da vegnir ussa cun novas pretensiuns demussass ina planisaziun pauc seriusa.
Tar il giubileum hai anc gì num che la Quotidiana na dovri betg dapli daners.
En la medema crenna dat er cusseglier guverantiv Martin Jäger.« Jau sun surstà da las pretensiuns da la Somedia. A chaschun dal giubileum da 20 onns Quotidiana aveva Hanspeter Lebrument la finala anc ditg ch'i na dovri betg dapli daners dal maun public», uschia Jäger. L’incumbensa da l’ANR saja da producir texts e fotografias per tut las medias rumantschas. Promover la «Quotidiana» en spezial na saja betg pussaivel. Era la basa legala manchia per ch’ina agentura da novitads dastgass producir ina gasetta.
Impurtant d’avair ina gasetta rumantscha surregiunala
La Lia Rumantscha è d’ina vart stada surstada da la brev cun la pretensiun da la Somedia, curt suenter il giubileum. Dentant haja l’istorgia da la «Quotidiana» mussà, ch’i è vaira difficil d’edir ina gasetta surregiunala. Il pled scrit en la gasetta saja dentant impurtant. Perquai sajan discussiun necessarias, cun l’ANR, il chantun, la confederaziun, las medias, la politica. Impurtant saja, ch’i dettia ina cuntinuaziun.
La «Quotidiana» saja stada ina gronda prestaziun, impurtanta per il moviment rumantsch, perder quella fissi in pass enavos. Il fatg ch’i dettia l’ANR dettia la persvasiun a la Lia, ch’ins chatti ina soluziun per edir il pled rumantsch en scrit era en l'avegnir.
Ultimatums perdan la forza sch’ins repeta els adina puspè, perencunter mintga ultimatum ston ins prender serius.
La pretensiun da la Somedia è sin maisa. Uss sto il gremi dal cussegl da fundaziun da l’ANR discutar davart quel. Decider sche l’ANR survegn dapli daners sto dentant la regenza.
Ultimatum per «La Quotidiana» n'è nagut nov
Gia il 2003 ed il 2008 aveva l'editur da la Somedia Hanspeter Lebrument smanatschà da far la gasetta quotidiana tar ina gasetta emnila – quai per cas ch’i dettia nagin sustegn finanzial da vart da l’ANR. En vigur n'èn dentant naginas da quellas propostas idas.
Svilup da «La Quotidiana»
| Data | Istorgia | Ediziun |
|---|---|---|
| 1996 | Confederaziun fundescha l'Agentura da Novitads Rumantscha ANR | |
| 1997 | 1. ediziun da «La Quotidiana» cumpara - ella è l'abunnenta principala da l'ANR | 7500 exemplars |
| 1998 | Midada da concept - paginas naziunalas ed internaziunalas vegnan davent, focus sin temas regiunals | |
| 2003 | Redacziuns en l'Engiadina e Surmir vegnan serradas - ANR surpiglia redacturs | |
| 2007 | 10 onns «La Quotidiana» - Lia Rumantscha fa amogna gasettas gratuitas durant dus onns | |
| 2008 | Hanspeter Lebrument smanatscha da far ord «La Quotidiana» ina gasetta da l'emna | 5500 exemplars |
| 2008 | Hanspeter Lebrument fa duas propostas: Südostschweiz surpiglia direcziun operativa da l’ANR u LQ fusiunescha cun l'ANR | |
| 2009 | Redacziun en Surselva vegn serrada - ANR surpiglia e paja redacturs - tar l'SO restan mo anc il schefredactur ed il persunal da producziun (correctorat) | 4700 exemplars |
| 2017 | Festa da giubileum 20 onns «La Quotidiana» ed ANR | 4000 exemplars |
RR actualitad 12:00
