Siglir tar il cuntegn
cuntegn

Exteriur Spagna vul il schaner 2019 elecziuns novas en Catalugna

Questa mesira haja la regenza spagnola prendida en egl ensemen cun la partida socialistica opposiziunala PSOE, ha ditg la politicra socialista Carmen Calvo il venderdi en in’intervista a la televisiun.

Lingiada davant in automat da raps.
Legenda: #laforcadelagent (la forza da la glieud) – sut questa devisa protestan sco qua Catalans e Catalanas cun ir per raps da lur contos da banca. Keystone

Suenter ch’il segund ultimatum da remetter las stentas per ina independenza da la Catalugna è scadì, prepara la regenza centrala da surpigliar formalmain la pussanza en la Catalugna.

Cabinet pudess decider damaun sonda d'applitgar art. 155

Per damaun sonda ha il primminister spagnol Mariano Rajoy clomà ils ministers spagnols ad in inscunter extraordinari. Ensemen pudessan els activar l’artitgel 155 da la constituziun spagnola.

Quai dess a la Spagna la basa legala per abolir il status d’autonomia da la Catalugna e suttametter la regiun a la regenza centrala a Madrid.

#laforcadelagent – u protestar cun ir per raps

Entant protestan separatists catalans cun in’acziun speziala: Sin il servetsch d’infurmaziun curtas Twitter curseschan sut il hashtag #laforcadelagent (la forza da la glieud) fotografias che mussan lingiadas da persunas avant automats da bancas.

Els èn clamads da las organisaziuns Radunanza Catalana Naziunala ANC ed Omnium Cultural, dad ir per exactamain 155 euros da lur contos da banca. 155 Euros sco la cifra da l'artitgel constituziunal 155 ch'inquietescha tut la Spagna.

Tweets che figureschan sut il hashtag #laforcadelagent:

Decisiun dal cabinet vegn a promover la mobilisaziun dals separatists

Uschia veglia Omnium Cultural mussar la forza dals pass pitschens, che mintgin sappia far. L’organisaziun haja gia annunzià da vulair demonstrar cun acziuns directas la forza dals consuments, scriva l’agentura da novitads tudestga DPA.

Per la fin d'emna èn annunziadas demonstraziuns a Barcelona.

RR novitads 12:00