Suenter in pled da passa 30 minutas dal president regiunal Carles Puigdemont avant il parlament regiunal a Barcelona sa sfadian ils observaders da tut las varts d'interpretar il discurs.
Puigdemont: «Nus vegnin ad avair in stadi»
En ses discurs ha Puigdemont menziunà duas giadas, ch'els na veglian betg rumper la lescha, ma che la Catalugna veglia entrar en in discurs cun la Spagna. El ha dentant er discurrì fitg bler da l'istorgia da la Catalugna e sia situaziun en la Spagna, cun segirar «Nus vegnin ad avair in stadi».
Puigdemont ha punctuà differentas giadas da vulair contribuir a la deescalaziun – tuttina na veglia el betg renunziar ad in stadi independent.
Lescha catalana: Proclamaziun da l'independenza aifer 48 uras suenter «gea»
La lescha catalana davart la votaziun dal 1. d’october aveva fixà, che ad in «gea» haja da seguir entaifer 48 uras ina decleraziun da l’independenza. Intgins represchentants da l’uniun da partidas da Puigdemont avevan dentant declerà avant, d'esser pronts per in cumpromiss.
Madrid refusescha
La regenza spagnola ha silsuenter refusà la decleraziun dal president regiunal da la Catalugna. In pledader da la regenza a Madrid ha ditg che la decleraziun zuppada da l'independenza catalana saja in act betg lubì.
Reacziun il decurs da mesemna
Il primminister Mariano Rajoy vegnia a prender posiziun tar las decleraziuns da Puigdemont. L'avantmezdi sa raduna il primminister da la Spagna Mariano Rajoy cun ses cabinet ed il suentermezdi las 4 è quintà ch'el prenda posiziun avant la chombra da represchentants. Quai ha ditg la presidenta da la chombra Ana Pastor.
La dumonda da la regenza catalana per in dialog, aveva il primminister Rajoy gia refusà pliras giadas. Ed era in'intermediaziun internaziunala na vegn per el betg en dumonda.
RR novitads 18:00++