Dapi ch'Uderzo ha publitgà avant passa 50 onns ensemen cun l'autur Goscinny l'emprim album da Asterix ed Obelix èn vegnids vendids plirs milliuns exemplars. Ils comics e lur umor gallic èn vegnids translatads en passa 100 linguas e dialects.
Asterix è sa sviluppà ad in fenomen. Passa 10 films d'animaziun ed er reals hai dà da las aventuras dal Gal. Il 1989 è avert il parc da temp liber sper Paris e plirs tschient products da commerzi èn vegnids producids.
Figl d'emigrants talians
Uderzo è naschì ils 25 d'avrigl 1927 sco figl d'emigrants talians en la vischinanza da Reims en Frantscha. La fin dals onns 1940 tutgava el tar ils dissegnaders cun il pli bler success, malgrà ch'el era tschorv per colurs. L'onn 1951 ha el emprendì d'enconuscher René Goscinny, in autur d'istorgias talentà.
Communablamain han els producì pliras serias, tranter auter «Pitt Pistol» e «Luc junior».
Asterix, il pli grond success
Lur pli grond success ha cumenzà l'onn 1959 cun Asterix. L'emprima aventura è cumparida en la revista «Pilote» avant che l'emprim album («Asterix le Gaulois») è cumparì dus onns pli tard.
Fin il 1977, l'onn che Goscinny è mort cun be 51 onns, ha il duo publitgà passa 20 albums cun las istorgias dals Gals. L'emprim album che Uderzo ha stgaffì persul è stà l'onn 1980, «Il foss grond» («Der grosse Graben») ch'è era vegnì edì per rumantsch.
Uss è il dissegnader franzos mort. Tenor la chasa editura Hachette è Uderzo mort en consequenza d'ina attatga dal cor.
