Ils 28 d’october 1959 chattan ins en ils kioscs da la Frantscha in nov magazin. Cun gronds bustabs alvs scrit sin fund cotschen stat scrit «Pilote». Quest magazin è l’idea d’ina gruppa d’auturs, tranter els René Goscinny ed Albert Uderzo.
Il magazin duess esser in magazin per giuvens, cun artitgels davart scienza, novitads dentant er cun comics. Aposta per l’emprima ediziun da quest magazin han els dus inventà ina nova figura. In um plitost pitschen, chavels e schnuz blond ed ina buttiglia verda cun ina bavronda magica.
Uderzo e jau, nus avevan inventà la figura ensemen durant ina conversaziun. L'idea è stada ina idea communabla. Nus essan pia tuts dus ils babs.
En il magazin chattan ins dentant betg l'entira l’istorgia dals Gals, be ina fin duas paginas. Quai duess animar ils lecturs da cumprar er la proxim’ediziun dal magazin, che cumpara mintg’emna. Ils emprims albums cun l'entira aventura cumpara l’onn 1961 cun in’ediziun da 6'000 exemplars.
In comic per mintgin
Las aventuras ch’han adina lieu 50 onns avant Christus èn plain sgnoccas, gieus da pleds e clischés. Uschia vulan ils auturs porscher insatge per tuts. Dals uffants ch'han gugent ils dissegns fin als intellectuals che sa legran da citats da l'imperatur Caesar u dad allusiuns a persunas istoricas.
Il 1967 vegn il film Asterix – Il Gal en ils kinos franzos. En tut il pajais empleneschan ils gals las salas, las criticas èn fitg bunas. Fin oz seguan anc 13 auters films. A Partir da l’onn 1974 na publitgeschan els dus betg pli en il magazin «Pilote». Tut lur comics davart ils Gals che seccan e pluntan ils Romans cumparan mo pli sco agen quadern.
La mort da René Goscinny
L’onn 1977 è in trist onn per ils fans dad Asterix. Ils 5 da november mora l’autur René Goscinny cun 51 onns vi d’ina attatga dal cor. Albert Uderzo ha lura, suenter in cas giuridic davart ils dretgs dad Asterix, creà in'atgna chasa editura. Vinavant ha el er cumenzà sez a scriver las istorgias. Fin uss aveva el surtut dissegnà els.
Dapi l’onn 2009, pia l’onn da 50 onns giubileum, na scriva e dissegna Albert Uderzo betg pli. Quai fan ussa Jean-Yves Ferri e Didier Conrad. Dapi l'onn 2010 èn els responsabels per Trubadix, Majestix, Miraculix, Idefix, Obelix ed Asterix.
Comics per tudestg
Dapi ils onns 1968 datti ils comics er per tudestg. Els han dentant duvrà pli ditg per vegnir propi populars. L’emprima traducziun d’in comic d’Asterix n’ha tenor la chasa editura tudestga Egmont betg gì grond success. Pir il segund carnet «Asterix e Cleopatra» ha gi dapli success. Quai surtut perquai che la traducziun è cumparida ensemen cun in film da Cleopatra.
Fin oz èn vegnids vendids 130 milliuns comics dad Asterix ed Obelix en Svizra, Austria e Germania. L’emprima versiun rumantscha è cumparida l’onn 1984. Tenor Egmont datti comics dad Asterix en passa 100 linguas.
RR actualitad 07:00