Il 1992 è vegnida fundada en Surselva la Brass Band Sursilvana. L'onn passà ha quella formaziun d'auta qualitad musicala midà il num en Graubünden Brass e quest onn ha ella celebrà ses anniversari da 30 onns cun in concert tut spezial: «Brass&Light» musica d'emprima qualitad inscenada cun impressiuns da glisch spectacularas.
Las trais ovras originalas «The Dark side of the Moon», «War of the Worlds» e «Journey to the Center of the Earth» mettan en tun ovras litteraras e cun illustraziuns projectadas vida las paraids dat quai in effect visual spectacular.
RTR ha fatg videos cun las impressiuns da glisch.
L'actur grischun Andrea Zogg ha introducì las ovras cun intginas decleraziuns.
L'instrumentala porta il concert dal prim d'october 2022 en la Stadthalle a Cuira.
Da la Brass Band Sursilvana a la Graubünden Brass
L'onn 1992 ha ina gruppa da musicistas e musicists da la scena da brass fundà la Brass Band Sursilvana. L'emprim dirigent è stà Gion Gieri Tuor che ha era pudì festivar il 1993 il titel da campiun svizzer en la segunda categoria. En emprima lingia vul la furmaziun far musica da brass d'auta qualitad. Quai cumprova ella adina puspè en ses concerts ed era a chaschun da concurrenzas naziunalas ed internaziunalas. Il 1997 ha la furmaziun fatg il pass en l'emprima categoria. L'onn 2004 e 2005 ha Urs Cadruvi dirigì la band e registrà cun ella il disc cumpact «Colurs». L'onn 2005 ha Roman Caprez surpigilà la direcziun e manà la BBS il 2006 al titel da campiun svizzer en l'emprima categoria. L'onn 2009 suonda il disc «Mia steila». Dapi il 2018 fa la band part a la categoria elita nua ch'ella ha cuntanschì il 2021 ed il 2022 mintgamain il segund plaz a la concurrenza naziunala. L'onn 2019 ha abditgà Roman Caprez suenter bunamain 15 onns ed ha pudì surdar la batgetta a Gian Stecher.
Cunquai che adina dapli musicistas e musicists na derivan ils ultims onns betg pli da la Surselva mabain ord l'entir chantun Grischun ha la band decidì il 2021 da midar il num a «Graubünden Brass» che resguarda uschia sin buna moda la derivanza tant da la band sco era da sias commembras e ses commembers.
L’emissiun preschenta furmaziuns da brass, armonias, fanfaras, musicas militaras, furmaziuns pitschnas ed auter pli.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
