L'internet n'è in spazi privat e segir, i dat adina in privel che datas privatas vegnan en ils mauns fallads. I dat dentant intgins tips per laschar enavos main fastizs.
- Updates: Sche la software è sin il pli nov stan, lura è il privel per leaks e hacks pli pitschen.
- Evitar servetschs gratuits: En regla fadian servetschs gratuits ils daners cun datas da las usras ed ils users. Intgins pon sa finanziar cun donaziuns.
- Preferenzas sin il telefonin: La fundaziun per protecziun da consuments ha publitgà instrucziuns per ch'i vegn tradì uschè pauc sco pussaivel da las datas da ses telefonin.
- Nizzegiar servetschs publics: Adina deconnectar ses conto tar apparats publics, e nizzegiar w-lans publics cun gronda precauziun.
Sistems d'IT han adina puspè mancanzas da segirezza, er la Confederaziun e schizunt ses servetsch secret èn regularmain pertutgads. Tantas mancanzas pon chaschunar gronds leaks da datas, er persunas privatas èn pertutgadas.
Ina moda da guardar sch'ins è pertutgà d'in leak è da tschertgar sia adressa d'email sin haveibeenpwned.com. En il mender cas, sche datas sensiblas u heiclas èn en la rait, èsi da contactar la polizia, schelentar ses contos da banca ed observar ses contos per activitads nunusitadas. I dat er assicuranzas per quests cas, ed in post federal da segirtad da cyber.
In'ulteriur tip da la fundaziun da consuments: dovrar servetschs da communicaziun, browsers e maschinas da tschertgar alternativs
- Messengers: Threema (varianta svizra, custa ina giada circa trais francs), Signal (sin basa da donaziuns voluntarias)
- E-Mail: Proton, Posteo, Mailbox.org èn variantas che nizzegian betg las datas persunalas, auter che per exempel Google e Microsoft
- Maschinas da tschertgar: Startpage, Metager ed Ecosia vegnan en il mument recummendà da la fundaziun da consuments sco alternativas tar Google e Bing
- Browsers: Firefox u Brave vegnan medemamain recummendà da la fundaziun da consuments
Per persunas mirvegliusas: Qua è in mussavia per chattar or, con bler datas persunalas che Google, Amazon, Meta e co. han rimnà da sa sez.