Sco sche las datas giessan tras in tunnel, cumparan ellas insanua auter. Pia no po ins betg vesair en la rait, da nua che las datas vegnan oriundamain. Per il pli: Interpresas da tracking han gia autras metodas, per identifitgar ensatgi en la rait, per exempel sur cookies ed infurmaziuns da ses browser.
Or da vista da protecziun da datas è in VPN cunzunt lura adattà, sch'ins dovra savens rait da WLAN externas. Tuttas che na dovrian in pled clav, sajan da principi privlusas, perquai ch'ellas pon vegnir nizzegiadas fitg simpel da hackar il computer u il handy, ed observar tge ch'ins fa en linternet. Er sch'ins na fida a ses agen provider d'internet, fa in tunnel da VPN senn.
Enstagl da fidar a ses provider, ston ins lura dentant fidar a ses servetsch da VPN. E qua èn cunzunt ils servetschs gratuits sez dubius. En tscherts cas èn schizunt vegnids chattads malware tar quels, e bleras appartegnan ad interpresas che n'èn absolut betg transparentas.
Betg tuts servetschs da VPN èn buns
Tge servetsch da VPN fa senn per ils agens basegns, dependa er da las circumstanzas. Quels trais servetschs vegnan recumandà en duas retschertgas independentas d'in lauter: NordVPN, Proton e Surfshark. Tuttas trais s'han laschà inspectar da partidas externas, ch'ellas na fetschian betg maldiever da las datas. Quel da Proton è plinavant gratuit, è dentant magari in pau plaun.
Bleras persunas enconuschan VPNs pervia da netflix u steam. Er han tschertas persunas nizzegià VPNs per cumprar in abunament da Spotify en la Brasilia, nua ch'el è pli bunmartgà.
VPN han dentant er autras muntadas pli impurtantas. Ellas lubeschan da guntgir censura da la rait. Perquai ha la Russia per exempel gia scumandà il 2021 tscherts servetschs da VPN, ed er en la China na dastgan tscherts servetschs betg vegnids utilisads. VPNs fan pia er pussaivel in access pli pauc restrenschì sin infurmaziuns.
