Il duel tranter il CB Domat ed il CB Trun/Rabius n'è stà nagina delicatessa da ballape, mabain in gieu dramatic cun bleras emoziuns ch'ha duvrà gnerva fin la fin. Malgrà che Domat ha gì las meglras schanzas da gol avant la pausa n'hai dà nagins gols en l'emprima mesadad.
5 gols suenter pausa
Suenter la pausa è Trun/Rabius vegnì dad ir cun 2:0 en avantatg, l'emprim entras in gol da Beat Cadruvi ch'ha nizzegià cun in sajet da distanza in pass fauss dal goli da Domat, quai en la 64avla minuta. Beat Cadruvi era pir intginas secundas sin la plazza. Paucas minutas pli tard ha Daniel Pfister tutgà al 2:0 suenter in bel conter da Trun/Rabius, in dals sulets ch'è reussì en quest gieu capital.
Suenter il 2:0 ha l'equipa da la Cadi che vegn trenada da Claudio Bundi però gì in blackout ed en curt temp è Domat vegnì d'egualisar il gieu, quai en la 76avla minuta entras Esa Ehrler ed en la 77avla minuta entras in sajet da Danilo Lozza ch'è la finala vegnì svià d'in giugader da Trun en l'agen gol.
Livio Janka decida il gieu cun culp liber da siemi
En il temp supplementar, en la 92avla minuta, survegn il CB Trun/Rabius in culp liber ord ina distanza da bun 20 meters. E quella schanza ha Livio Janka nizzegià al 3:2. Il defensur da Trun aveva gia decidì il gieu encunter Domat l'atun cun ses 4:3 entras in penalti en la 93avla minuta.
Grazia a questa victoria impurtanta ha il CB Trun/Rabius pudì sa distanziar in zic dal stritg ed uschia dad in plaz da relegaziun. Trun/Rabius resta bain sin il 10avel plaz da la tabella, da nov dentant cun quatter puncts avantatg sin Domat. A la cua da la tabella è Flums cun sis puncts pli pauc.
USSI gudogna a chasa
L'US Schluein Glion ha giugà la dumengia a chasa cunter Mels. Ils sursilvans gudognan cun 4:0 e restan sin il segund plaz da la terza liga.
Victoria per ils Puschlavins
En la segunda liga regiunala ha Valposchiavo Calcio gudagnà la partida da chasa encunter Buchs cun 3:0. En la tabella è Valposchiavo Calcio da nov sin plazza 6 e Buchs croda enavos sin plazza 8.
Sco proxim giogan ils Puschlavins en in'emna encunter il segund da la tabella, Rorschach-Goldach.
En la segunda liga interregiunala gioga Cuira ordaifer encunter Bülach pari 0:0. Cuira 97 resta en la tabella sin plazza 7.