Ils da Schluein Glion han dominà da bell'entschatta il duel encunter ils da Trun/Rabius. Han fatg squitsch, maina laschà vegnir l'adversari en il gieu. E nezzegià mintga schanza. Il club da la Foppa è ì en la pausa cun in avantatg da 4:0. Ils da Trun/Rabius n'han mai chattà en il gieu, era betg suenter la pausa. Nagut n'ha funcziunà. En la segunda mesadad incassescha il club da la Cadi ulteriurs trais gols. La victoria meritada da 7:0 da l'US Schluein Glion reflectescha era la fermezza da las duas equipas. L'USSI cumbatta davanttiers en la tabella da terza liga (actual sin il segund plaz). Il CB Trun/Rabius è davostier, gist sur il stritg, e cumbatta per restar sur il stritg e da betg stuair far a la fin dal campiunadi il pass en quarta liga.
La segunda mesadad
Ils da Schluein Glion prendan bain enavos in pau la cadenza en la segunda mesadad. Chapaivel suenter lur avantatg da 4:0. Tuttina gartegi a l'equipa dal trenader Patric Casutt da sajettar ulteriurs trais gols. Als da Trun/Rabius na basti gnanc da tuccar il gol da l'onur.
L'emprima mesadad
Ils giugadurs da l'US Schluein Glion arrivan bler pli persvadì e dominant sin il plaz. Dattan en il tun, combineschan fitg bain, laschan circular il bal, dattan svelt e frestg enavant. Suenter 12 minutas tutga Rafael Deplazes l'emprima giada per l'equipa da la Foppa. En la 28avla minuta èsi Lars Caduff che sajetta in culp liber da belleza, en il chantun aut, ch'il goli n'ha nagina schanza da tegnair. Il 2:0 è realitad. Avant pausa èsi lura anc Ruben Rechenbach che fa gist dus gols. Cun quest resultat vai en la pausa.
Ils trenaders Patric Casutt e Claudio Bundi avant il derbi
«Tgi che na giauda betg in tal gieu na giauda er betg da dar ballape», manegia Claudio Bundi, trenader da Trun/Rabius avant l'emprima mesadad dal gieu. E che la tabella na correspundia betg adina exnum a la realitad, da quest avis è Patric Casutt. Communabel han omadus che lur squadra duai gudagnar il derbi.
Avant il derbi sursilvan: Ils finals èn realitad
Il CB Trun/Rabius ha persvadì en la Cuppa grischuna da ballape. En il mezfinal ha il club da la Cadi battì gist cun 5:0 il club da Domat. Ina ferma partenza suenter la pausa d'enviern. Tant pli ch'ils da Domat èn en il campiunadi da terza liga vischins dals da Trun/Rabius, a la fin da la tabella. Omadus cumbattan encunter la relegaziun. Cuntanscher il final da la Cuppa grischuna e gugent laschar vegnir la trofea en la Cadi, ha il club declerà sco ina da las finamiras. En il final (ils 9 da matg) spetga la segunda equipa da Cuira 97.
Er ils da Schluein Glion han persvadì la fin d'emna da Pasca. Il club da la Foppa ha cuntanschì il final da la prerunda da la Cuppa svizra. Ordaifer ha Schluein Glion battì Pfyn, il club da quarta liga da la Turgovia cun 2:0. En il final (ils 26 da matg) spetga cun il FC Besa (Son Gagl) medemamain in club che dat en terza liga. Gudogna Schluein Glion quest duel, è il club da la Foppa en la runda principala da la Cuppa svizra. Là poi vegnir ad in duel encunter in grond dal ballape svizzer. Tut tenor encunter in club da la Super League, tge che fiss sa chapescha insatge grond per la pli ferma equipa da ballape da la Surselva.
Il derbi gist al cumenzament
N’importa betg cura, al cumenzament u pir a la fin, derbis èn adina spezials, en blers reguards. Dapli emoziuns, sin e sper il plaz. Cura ch'ils dus rivals eterns dal ballape en Surselva s'inscuntran, sa raduna era adina ina gronda culissa d'aspectaturs e fans fervents. Tge che contribuescha a la tensiun, lascha crescher la gnervusadad ed ils cumbats sin il plaz èn stedi in pau pli dirs.
Trun/Rabius sto far ils puncts cunter concurrents directs
Il CB Trun/Rabius ha terminà la runda d'atun cun 10 puncts ord 11 gieus sin il 10avel plaz en la tabella. Gist in plaz sur il stritg da relegaziun. E là vul l'equipa er esser a la fin da la stagiun, sur il stritg, e restar en terza liga. Per cuntanscher questa finamira sto il CB Trun/Rabius far ils puncts encunter ses concurrents directs. Quai di il trenader Claudio Bundi, ch'ha surpiglià l'equipa il cumenzament da la stagiun. Per che quai gartegia ston ses giugaders surtut mussar dapli sang fraid davant il gol. En la runda d'atun ha savens il pass decisiv mancà, mintgatant er in pau il cletg. Plirs gieus han ins pers cun be in gol differenza.
Sche Luca Maissen stuess decider, lura pli gugent perder il derbi e persuenter restar en terza liga, uschia il defensur. Ma cler, ch'ins emprova tut da gudagnar e metter ina chomma als da Schluein Glion e prender revantscha per il gieu d'atun, pers cun 0:3. Bain savend ch'ils adversaris èn ils favurits e ch'i vegn a dar in dir gieu. Ins vul surtut profitar e nizzegiar l'avantatg da chasa. Sin lur plaz a Pustget, ha il CB Trun/Rabius adina puspè mussà prestaziuns respectablas encunter il grond rival da la Foppa. Ch'il derby dat gist il cumenzament a la runda da primavaira vesan ils giugadurs detg positiv. Suenter ina lunga fasa da preparaziun, èn motivaziun e tensiun grondas da persvader gist en l'emprim gieu. Vitiers vegnan il schlantsch e la confidenza ch'ins è curt avant il derby sa catapultà cun in veritabel festival da gols en il final da la Cuppa grischuna.
Schluein Glion vul defender ses plaz en la tabella
L'emprima mesadad dal campiunadi ha l'US Schluein Glion terminà sin il segund plaz. Ha recaltgà en las partidas 22 puncts. Il retard sin il leader da Schaan munta ad 11 puncts. Il club dal Principadi dal Liechtenstein ha dominà la concurrenza e gudagnà tut ils gieus en la runda d'atun. Stuschar els da la testa da la tabella, missiun tant sco na pussaivla. Ma era ils da Schaan pon stgarpitschar en in u l'auter gieu fin la fin dal campiunadi. Defender il segund plaz en la tabella, quai è la finamira, uschia Patric Casutt, ch'è dapi la stad passada scheftrenader. Tut tenor constellaziun, la fin da la stagiun, èsi pussaivel ch'era in dals segunds en ina da las gruppas da 3. liga vegn promovì en la segunda liga.
Cun Patric Casutt a la lingia è l'equipa vegnida marcant pli giuvna. Bunamain la mesadad dals giugadurs èn tranter 18 e 20 onns. Els dovran temp da giugar sin livel da terza liga. Temp ch'ins dettia, uschia il trenader. L'integraziun funcziunia bain e saja ina investiziun en il futur da la pli ferma equipa da ballape en Surselva. Ch'ella è quai, vulan ins era mussar en il derbi encunter Trun/Rabius. Nus essan individual ils megliers giugaders ed avain dapli qualitad, tge che vegn la finala a procurar per la differenza, uschia il chapitani Gian Sgier ed il capo-tiragols Lars Caduff. Betg turnar cun 3 puncts enavos en la Foppa fiss ina trumpada.
Rivalitad be 90 minutas
Il CB Trun/Rabius e l'US Schluein Glion, dus clubs che s'enconuschan fitg bain. Er ils giugadurs. Ils pli giuvens han en lur temp da juniors perfin giugà ensemen. Rivalitad e cumbat sin il plaz, durant il derbi, gea. Ma senza vulair insatge dal mal al visavi e suenter il gieu dar il maun, analisar ensemen e gugent era baiver ina gervosa ensemen. Era sch'in derbi è adina in punct culminant, a la fin èsi in gieu da ballape da terza liga.
