Il Cussegl federal ha approvà las adattaziuns da l’ordinaziun da chatscha, quella prevesa:
- A partir dal prim da december dastgan lufs era vegnir sajettads a moda preventiva, era sch'i n'han fatg nagin donn u stgarpà in animal da niz. La cundiziun è ch'i dat in privel.
- Er entirs trieps pon vegnir sajettads a moda preventiva sche quai è giustifitgà.
- Da nov datti in plan cun tschintg regiuns en Svizra che prevesa per mintga regiun in dumber minimal da trieps. Per la Svizra Sidorientala è definì (Grischun, Son Gagl e Tessin) minimalmain trais trieps.
La realisaziun svelta saja en vista a l’augment exponenzial dal dumber da lufs e trieps necessaria, ha il cusseglier federal Albert Rösti declerà davant las medias. Quai pussibiliteschia als chantuns da far gia il december proxim ed il schaner regulaziuns da trieps preventivas. Fatgas vegnian quellas dals guardiaselvaschina ubain era da chatschadras e chatschaders instruids.
La nova ordinaziun da chatscha prevesa in dumber minimal da 12 trieps en Svizra. Oz datti sulettamain en il Grischun 12 trieps da lufs, en l'entira Svizra datti 32 trieps (radund 300 lufs).
Anc adina ston ils chantuns giustifitgar la regulaziun
Era cun la revisiun da la lescha da chatscha resta il luf ina spezia protegida. Perquai dastgan ils chantuns allontanar lufs ed entirs trieps mo en cas giustifitgads. Regular a moda preventiva lufs e trieps sajan sch'ils lufs mussian in cumportament che dat en egl sco p.ex. s'avischinar ad abitadis durant il di, s'avischinar a carstgauns, attatgar chauns e sch'el n'è betg spuritg.
Per mintga regiun vala in dumber minimal
Tenor l’ordinaziun da chatscha è la Svizra partida en tschintg regiuns. En regiuns grondas ston vegnir mantegnids almain trais trieps – en regiuns pitschnas èn quai dus trieps. Ultra da quai na dastgan trieps che na chaschunan nagins donns betg vegnir regulads a moda preventiva.
Cun la regulaziun preventiva pudessan, tenor il Cussegl federal, ils lufs puspè vegnir pli timids. Pervia da quai pudess il dumber da trieps en singulas regiuns esser pli grond ch'il dumber minimal prescrit. Uschia possia il dumber da lufs en Svizra vegnir mantegnì, quai cun reducir a medem temp ils donns. Per regular trieps da lufs dovri sco fin ussa l’approvaziun da la Confederaziun.
Ina mesira temporara avant ch’ella va propi en vigur
L'emprima part da l'ordinaziun da chatscha revedida vegn messa en vigur temporarmain. Il Cussegl federal vegn a dar en consultaziun la primavaira 2024 las disposiziuns davart la regulaziun dal triep ch'èn vegnidas concludidas ussa, ensemen cun il rest da la realisaziun da la nova lescha da chatscha. L'entir pachet duai entrar definitivamain en vigur il prim da favrer 2025.
