L'Uffizi federal per l'ambient sut il cusseglier federal Albert Rösti vul reducir marcantamain il dumber dals lufs en Svizra cun la revisiun da l'ordinaziun da chatscha. Da nov duai er esser pussaivel da sajettar entirs trieps preventivamain, senza ch'i hajan stgarpà animals. Quai per regular la populaziun dals lufs.
Quai mussa in sboz da la nova ordinaziun da chatscha ch'è avant maun a RTR. Las pli grondas midadas sche l'ordinaziun vegn tras:
- Lufs duain vegnir sajettads a moda preventiva, er sch'i n'han fatg nagin donn u stgarpà in animal da niz
- Er trieps entirs duain pudair vegnir sajettads a moda preventiva
- Da nov duai dar ina glista che definescha ina valur minimala per ils trieps. Per exempel vegn definì per la regiun Svizra Orientala (Grischun, Son Gagl e Tessin) in dumber minimal da trais trieps ch'ins sto tolerar.
Pro Natura tema «mazzacra da lufs»
Da la vart da las organisaziuns per la protecziun da l'ambient avevan quels plans gia chaschunà critica. Per la Pro Natura per exempel van questas mesiras memia lunsch. Lur pledadra tema che la nova ordinaziun da chatscha chaschunia ina «vaira massacra da lufs». Pro Natura stima che dus terzs da la populaziun actuala da lufs da radund 300 lufs pudessan vegnir sajettads.
Tenor las organisaziuns da l'ambient vul quai dir concret che il sboz da la l'ordinaziun prevesa da pudair regular ils lufs dad oz cun var 31 trieps sin 12, tge che fiss ina reducziun da 60%. Oz datti sulettamain en il Grischun 12 trieps da lufs.
Plinavant crititgeschan las uniuns da natira il proceder da consultaziun. Mo singulas gruppas d'interess han pudi s'exprimer e quai mo dals 28 avust fin ils 6 settember. Tenor las organisaziuns avess la consultaziun er stuì esser publica.
L'Uffici federal d'ambient declera la curta consultaziun cun la finamira da pudair metter en vigur l'ordinaziun per ils emprims da december.
Sustegniders van anc pli lunsch
11 trieps da lufs tanschan. Quai di l'Uniun svizra per la protecziun dals spazis da viver rurals cunter animals da rapina gronds e sustegn uschia ils plans da la Confederaziun. I saja da reducir massiv il dumber dals lufs per proteger ils interess da l'agricultura e la segirezza da la populaziun, communitgescha l'associaziun.
Er ils purs svizers vulan reducir ils trieps marcantamain. Dentant van las ordinaziuns per els memia pauc lunsch. I stuess ir anc pli simpel da sajettar ils lufs, scrivan els.
