La suprastanza communala da Vaz avess gugent realisà il nov lido il 2025. Il vegl na correspunda betg pli als basegns dals giast. Memia paucas duschas e tualettas, nagin sut tetg per consumar insatge. Dis da buna frequenza quintan ins da stad 3'000 persunas e d'enviern 800 persunas sper il lai. ll nov bajetg da lain ed en furma da mez rudè ha gudagnà la concurrenza d'architectura e n'è betg grond mess en discussiun dal cussegl communal. Tuttina saja da resguardar il termin da realisaziun er en rom dal plan da master «Lai da Planeiras» elavurà il 2021. Surtut saja da tegnair en egl ils custs che spetgan la vischnanca cura ch'ils dus rampars dal lai ston vegnir realisads ils proxims onns.
Suprastanza surstada
Il president communal da Vaz Maurin Malär n'ha betg propi quintà ch'il cussegl communal refusa per il mument il project lido. El saja fitg surstà da la decisiun – ma quai saja la via politica. Ussa saja da surluvrar en spezial ils termins e preschantar in nov concept e quai vegni segiramain a retardar la realisaziun dal lido nov. Planisà era ina decisiun a l'urna ils 30 da zercladur da quest onn.
