L'Ovra electrica da la citad da Turitg EWZ vul auzar il mir da serra al Lai da Marmorera per 14 meters. Per far quai, stuess er la via dal Pass dal Güglia vegnir spustada. Quella maina numnadamain per lung dal lai.
La capacitad da producziun da l'ovra electrica dal Lai da Marmorera restass tuttina auta, di l'EWZ sin dumonda da RTR. Durant l'enviern pudess l'ovra dentant augmentar la producziun d'electricitad per 50 uras gigawatt.
Sch'il mir dastga vegnir auzà, decida la Confederaziun. Cun ina decisiun da l'Uffizi federal da vias quintia l'EWZ anc la stad, cunquai ch’il project saja gia avanzà fitg, ha ditg il directur Benedikt Loepfe. Vegniss il livel dal lai auzà, alura stuess era la via vegnir spustada pli ensi. L’uffizi da vias vul proximamain far studis, tge varianta dal trassé che fiss la meglra, ha el ditg sin dumonda da RTR.
Custs auts
Las Ovras electricas da Turitg quintan cun custs da dapli che 100 milliuns francs per realisar il project. Tgi che paja quant n’è betg anc cler. L'EWZ spera sin in gea a la nova lescha d’energia quest zercladur. Quai muntass dapli subvenziuns da la Confederaziun. In’auter punct dispitaivel è actualmain la concessiun da manar il lai da Marmorera. Il 2035 scroda il contract ed igl è per il mument betg anc cler, sche l'EWZ po vinavant gestiunari il lai da fermada da Marmorera
Sco che l’interpresa turitgaisa ha ditg envers RTR, stoppian ins reglar bain tge che capitass cun las investiziuns fatgas en il rempar, per il cas che l'EWZ na pudess en l’avegnir betg pli esser responsabla per il lai da fermada.
Auters projects da l'EWZ han fatg naufragi
Suenter che l’EWZ ha quest onn gia stuì sepulir dus projects da solar gronds en il Grischun, fiss quai ina pussaivladad da promover la producziun electrica durant l'enviern. L'ovra solara Nandro refusada da la vischnanca da Surses avess procurà per 66 uras gigawatt per onn. L'ovra idraulica dal Lai da Marmorera producescha radund 200 uras gigawatt per onn.
