Avant 100 onns ha il medi Carl Spengler, figl dad Alexander Spengler che ha mess l’emprim crap da fundament dal lieu da cura a Tavau, fundà la Cuppa Spengler. Ses emprim intent è stà da sustegnair il club da hockey da Tavau, ma a medem temp er da reunir las naziuns inimisadas da l'emprima guerra mundiala cun contacts sportivs. Carl Spengler ha gì l’idea da dar la pussaivladad a las naziuns ina giada inimias da chattar la chapientscha vicendaivla e la confidenza en in spiert fair ed amicabel e da dar il maun a moda sportiva ed amicabla. Questa idea è sa sviluppada ad in eveniment unic che giauda status da cult en la scena da hockey sin l’entir mund.
Carl Spengler vuleva cun la fundaziun da la Cuppa Spengler segir er sustegnair il club da hockey da ses figl Alexander. L’idea fundamentala era dentant bler pli gronda: in turnier sportiv cun equipas internaziunalas che unescha er naziuns ina giada inimias.
L’emprima Cuppa Spengler ha gì lieu la fin da l’onn 1923. Quatter equipas han cumbattì per l’emprim buccal. 100 onns pli tard è quest turnier da hockey in dals gronds eveniments da sport en Svizra che giauda in renum da cult en la scena da hockey internaziunala. Il pli vegl turnier da club da hockey internaziunal è ina impurtanta funtauna da gudogn per il HCD. Senza la Cuppa Spengler na fiss il campiun da record betg là nua ch’el è oz.
La Cuppa Spengler è in turnier che renda, quai n'è nagin misteri. Senza fiss il HCD là nua che ils auters clubs grischuns èn.
La 95avla ediziun Cuppa Spengler empermetta hockey d'auta qualitad. Las pli fermas naziuns da hockey vegnan er quest onn ad esser da la partida. Partizipants èn il defensur dal titel HC Ambri-Piotta, il victur da record Team Canada, KalPa – il victur da surpraisa finlandais da l'onn 2018, il HC Dynamo Pardubice, il leader actual da la liga tscheca, Frölunda HC Göteborg ed il club da hockey da Tavau, ch'è ospitant.
