La Cuppa Spengler è ina da las pli grondas occurenzas da sport en Svizra. Dapi 100 onns vegn gia dà hockey sin glatsch a Tavau tranter Nadal e Bumaun e procurà per spectachel sin il glatsch. Pervia da la Segunda Guerra Mundiala u er pervia da la pandemia da corona èsi quest onn bain «100 onns Cuppa Spengler», igl è dentant pir la 95avla ediziun dal turnier. Ma cler ch'igl è vegnì scrit numerusas istorgias a Tavau durant l'ultim tschientaner. Nus avain rimnà persunalitads ed istorgias da la Cuppa Spengler che na van betg uschè spert en emblidanza.
Victurs singulars e victurs da record
Dapi 100 onns vegn cumbattì per il titel da la Cuppa Spengler. Durant quest temp hai dà 30 differentas equipas ch'an pudì auzar ad aut il buccal. L'emprima victura il 1923 è stada l'universitad dad Oxford. Il HCD ha gudagnà il 1927 per l'emprima giada il turnier da chasa.
- 1. Team Canada cun 16 triumfs
- 2. Club da hockey da Tavau cun 15 triumfs
- 3. LTC Prag cun 7 triumfs
- 4. Spartak Moscau cun 5 triumfs
- 4. ASD Duka Jihlava (CZE) cun 5 triumfs
E tgi fa quest-onn la cursa?
Dapi il 2011 n'ha Il club da hockey Tavau betg pli gudagnà il turnier da chasa. Cler ch'ils Grischuns vulan finalmain puspè midar quai. La concurrenza è dentant sco mintg'onn gronda. Nus prendain sut la marella las sis equipas che cumbattan tranter Nadal e Bumaun per il titel da la Cuppa Spengler.
Club da hockey Tavau: Dapi 12 onns spetga Tavau sin ina victoria a la Cuppa Spengler. E simpel na vegni er quest-onn betg. Gia durant l'entira stagiun manca la constanza tar il HCD. Duessi gartegiar cun il 16avel titel sto l'equipa far il proxim pass e far dapli ch'usitadamain. Cler è dentant er ch'ils Grischuns vegnan ad investir tut per puspè persvader ina giada al turnier da chasa.
Team Canada: Ils Canadais han trumpà l'onn passà e gudagnà betg ina solia partida. Cler ch'ins dastga spetgar quest-onn ina reacziun dal victur da record. Uschia èn els er quest'onn in dals favurits. Manager da l'equipa è nagin auter che l'anteriur giugader dal HCD e star da la NHL, Joe Thornton.
Ambri-Piotta: Atgnamain tutgan ils Tessinais er quest'onn betg tar in dals favurits. La medema situaziun ha Ambri gia gì l'onn passà e lura han els gudagnà sensaziunalmain la Cuppa Spengler. Ins dastga en mintga cas puspè spetgar hockey cun bleras emoziuns ed intensitad dals «Biancoblu».
HC Frölunda: L'equipa da la citad da Göteborg è in'equipa da tradiziun en Svezia. Tschintg giadas èn els vegnids campiuns svedais e la Champions Hockey League han els gudagnà quatter giadas (2016/2017/2019/2020). Er sche betg tut na va actualmain tenor giavisch en il campiunadi actual, è Frölunda segir in'equipa ch'ins sto avair en egl a la Cuppa Spengler 2023.
HC Dynamo Pardubice: Els èn actualmain a la testa dal campiunadi tschec e tutgan là dapi onns ils topclubs. Sin in titel da campiunadi spetgan els dentant dapi il 2012. Sco leader dal campiunadi tschec tutgan els segir er tar in dals cun-favurits da la Cuppa Spengler. Per Dynamo Pardubice è la Cuppa Spengler da quest'onn gia la terza en sia istorgia.
KalPa Kuopio: Ils Finlandais èn stads ils gronds victurs da surpraisa a la Cuppa Spengler 2018. Cun lur hockey passiunà han els dentant fascinà ils fans. En Finlanda na tutgan els betg tar ils gronds clubs da hockey. Savens èn els stads en la sumbriva da clubs sco Tappara Tampere u Jokerit Helsinki. Ils ultims onns è KalPa Kupoio dentant vegnì da fitgar pe en l'emprima mesadad da la tabella da la liga finlandaisa.
Dals 26 fin ils 31 da december vegn cumbattì en il stadion a Tavau per il titel da la Cuppa Spengler. Fin 100'000 persunas fan durant quests dis il viadi a Tavau per esser ina part dal turnier da tradiziun. Quai malgrà ch'i dat mo radund 70'000 bigliets per ils 11 gieus.
Giais er Vus a la Cuppa Spengler? Tramettai Vossas impressiuns da la Cuppa Spengler sin multimedia@rtr.ch.
