Ir ina giada enturn l’entir mund - in siemi da blers. Entant ch’ils ins fan quai en furma da viadi cun tren, aviun e bus, tschertgan auters l’aventura. La moda e maniera co che quels fan quai è lura era fitg differenta.
Istorgias, aventuras ed impressiuns
Gion Hosang ha retschertgà ed chattà in pèr istorgias interessantas. El ha fatg ina rangaziun tranter trais gruppas da viagiaturs e lur aventuras. Il viadi il pli spezial ha dentant fatg ina giuvna americana, Abby Sunderland. Daco? Tadlai sez!
Tut suletta sin viadi enturn il mund
Savessas metter avant d’esser in mez onn tut persuls? Senza bab, mamma e fragliuns? Insanua a mez la mar sin ina nav? Abby Sunderland ha sco quai ch’i para nagin problem cun quai. La giuvna da 16 onns da California en ils Stadis Unids da l’America è sa messa sin viadi cun sia nav a vela e vul far cun quella in viadi enturn l’entir mund.
Laura fa in viadi enturn l'entir mund
Era Laura ha vulì ir en bartga ina giada enturn l'entir mund. Emprim era la dretgira ollandaisa da l'avis ch'i saja memia privlus per ina giuvna da 13 onns da sa metter sin quest viadi tut suletta. In onn pli tard è l'idea da la dretgir tuttina sa midada e Laura ha dastgà ir. In entir onn è ella stada sin viadi.
