Tgi na posseda betg in IPhone, in Ipod Touch u in auter apparat ch'ins po manipular cun la detta. Mo co funcziunan quels touchscreens insumma? Ch’il telefonin sa dapli che mo telefonar, quai savais vus segir. Interessant èn bain ils gieus che sa chattan sin quels u ch’ins po installar. E cun il nov telefonin dad Apple, igl iPhone 4S pon ins ussa schizunt discurrer. Funcziuna quai insumma?
Co funcziuna il touchscreen?
Ozendi ha prest nagin pli in simpel telefonin cun il qual ins po “mo” telefonar. Ils blers han in uschenumnà “smartphone” – quai vul dir sch’ins translatescha “in telefonin perdert”. Da quests datti da differentas marcas e cun differents sistems operativs (guarda chaistina giudim). Per mintga sistem datti lura era millis e millis d’applicaziuns da tuttas sorts ch’ins po installar. Saja quai gieus per sa divertir u lura era gieus cun quels ch’ins po emprender. Quests programins funcziunan per il pli era sin ils pitschens computers sco ils iPads.
Discurrer cun il telefonin
Dictar in text e dar cumonds al computer quai pon ins gia daditg. La tecnica per far quai n’è betg nova. Mo duvrada vegn questa pussaivladad anc betg savens. Quai pudess dentant sa midar. Cun il nov telefonin dad Apple – igl iPhone 4S han ussa blers questa tecnologia en giaglioffa. Funcziuna quai propi e co funcziuna quai insumma?
Emprender cun il telefonin
Magari fai dapli plaschair d’emprender cun ina applicaziun. Da quellas datti bleras e perquai datti qua dus tips.
Matematica
Far quint a chau – quai è bun per il tscharvè. Quants quints vegnis da far aifer ina minuta? Quai pon ins empruvar cun l’applicaziun “Rechentrainer Lite”.
Sistem: iOS*
Custs: gratuit (versiun simpla) 3.00 francs per ina versiun ch’ins po era inditgar la grevezza dals quints.
I dat sa chapescha era ina applicaziun sumeglianta per Android. La versiun simpla è gratuita fa dentant be quints da plus (adiziun) e minus (subtracziun), la versiun che fa era quints da gia (multiplicaziun) e parter (divisiun).
Sistem: Android*
Custs: gratuit (versiun simpla), 1.10 francs per la versiun cumplaina
Lingua
Tge linguas emprendais en scola sper il rumantsch? Tudestg u forsa gia englais? Per emprender pleds datti era bleras applicaziuns. Babbel.com porscha tranter auter applicaziuns per emprender tudestg, englais, talian, franzos. Ins po tadlar ils pleds e pledar suenter quels. Han ins pledà suenter endretg il pled vegn ins tar il proxim pled. I dat dentant era auters exercizis per emprender pleds en la lingua giavischada.
Sistem: iOS, ina versiun per Android è en lavur
Custs: gratuit
Link tar l'applicaziun
Gieus
Per sa divertir – e na betg studegiar massa bler – datti sa chapescha gieus.
Angry Birds – utschels vilads
Angry Birds è in gieu cun grond success ch’i dat tant per ils apparats mobils da Apple sco era per quels d’Android. Pors han engulà ils ovs dals utschels e quels ovs vulan ils utschels puspè survegnir enavos. Perquai èsi da sajettar ils utschels cun ina funda (Schleuder) sin ils bajetgs nua ch’ils pors èn sa zuppads. La finamira è d’eliminar tut ils pors. Il gieu ha plirs nivels.
Custs: gratuit
Sistem: iOS, Android
Link tar l'applicaziun iOS
Link tar l'applicaziun Android
Cut the Rope – taglia la suga
Tagliar la suga per ch’il rustg survegnia las dultscharias che pendan londervi. Quai è declerà simpel il gieu “Cut the rope”. Ma uschè simpel n’èsi lura tuttina betg. Igl è anc da rimnar stailas e laschar schluppar las borlas da savun. Igl è pia da studegiar bain tge ch’ins fa.
Custs: 1.00 franc
Sistem: iOS
Link tar l'applicaziun iOS
Link tar l'applicaziun Android
*iOS ed Android
Tar iOS ed Android sa tracta quai da sistems operativs. Tar il computer fiss quai Windows, Linux u Mac OSX. iOS è il sistem operativ per apparaturas da Apple, sco per exempel igl iPhone, iPad u lura era per igl iPod touch. Android è in sistem operativ per telefonins da bleras marcas da telefonins.
Nus avain laschà empruvar ora las collavuraturas ed ils collavuraturs da Radiotelevisiun Svizra Rumantscha l'applicaziun SIRI ch'è sin il nov iPhone. Guardai sez sche SIRI chapescha tut ils cumonds u na.