En connex cun las demonstraziuns ed ils tumults en l’Egipta aud’ins era adina puspè il num Facebook e Twitter. Quellas paginas d’internet èn numnadamain era vegnidas tratgas a niz per lantschar las demonstraziuns.
Tar Facebook e Twitter sa tracti da paginas d’internet per communitgar in cun l’auter. La finamira da quellas è da star en contact cun amis da manaivel e da lunsch, chattar persunas ch’han ils medems interess u er per raquintar tge ch’ins fa gist.
Quellas paginas d’internet han era gì ina tscherta influenza tar las demonstraziuns en l’Egipta. Ina da las fermezzas da tals sistems è ch’ins po derasar infurmaziuns fitg spert. Sch’jau scriv per exempel insatge en in da quels sistems, lura vesan mes amis tar Facebook u las persunas che suondan mess messadis tar Twitter quai ch’jau hai scrit. Quai po tut tenor plaschair a quels uschia ch’els dattan vinavant quest messadi a lur amis. Sche quai capita pliras giadas èsi prest cuntanschi bleras tschient persunas u anc bler dapli.
Gist quest effect è vegnì tratg a niz en l’Egipta. Persunas che vulan in’autra regenza per l’Egipta han clamà via Twitter e Facebook ad ina demonstraziuns. A quell’emprima demonstraziuns han passa 18’000 persunas fatg part. Cler che na betg tut quellas persunas èn vegnidas perquai ch’i han vis quest clom en l’internet. Ma l’internet ha gidà da reparter spert quell’infurmaziun tar la populaziun.
In sumegliant fenomen pon ins era adina puspè vesair en Svizra. Magari vegni clamà ensemen glieud per far ina acziun che para dad esser spontana. I vegn publitgà via l’internet, in lieu, in temp e tge ch’i vegn fatg. Per exempel far ina battaglia da plimatschs u lura star eri, sco sch’ins fiss schelà en. Persunas che n’enconuschan betg quai èn lura tut surstadas.
Mo adina n’è quai betg uschè spontan sco quai ch’ins pensa. Tar acziuns nua ch’i vegn sautà sa rima la glieud savens gia avant ina giada per trenar la coreografia.
Perquai che l’internet porscha pussaivladads da derasar svelt novitads e da far che per exempel bleras persunas sa radunan èsi en il cas da l’Egipta vegnì tschentà giu l’internet. Uschia na vai betg uschè bain d’infurmar insatgi nua ch’i vegn sa radunà per far ina proxima demonstraziun.
Dapli davart il pajais Egipta..