Siglir tar il cuntegn

Header

cuntegn

Lexicon R Religiuns grondas

Sin il mund datti bleras religiuns. Mintgina è autra e tuttina datti parallelas. Pertge savens è ina religiun naschida ord in’autra. La nova religiun ha lura magari salvà tschertas chaussas ed agiuntà autras. Nus dain in’egliada sin las tschintg pli grondas religiuns.

Cristianissem

Cun 2,1 milliardas cartents è il cristianissem la pli gronda religiun dal mund. Il cristianissem datti dapi var 2000 onns. La crusch è il simbol principal per il cristianissem. Dapli dal cristianissem...

Islam

La religiun da l’islam è var 1400 onns veglia. Sin l’entir mund datti var 1,3 milliardas muslimas e muslims (quai munta quel/quella che suttametta a Dieu). Davent dal 13avel tschientaner è la mesaglina il simbol per lur religiun. Dapli da l'islam...

Hinduissem

Las ragischs dal hinduissem giaschan var 3000 onns en il passà. Cun 850 milliuns cartents è il hinduissem la terz gronda religiun dal mund. Ils cartents vivan bunamain mo en l’India. Il simbol per il hinduissem è il segn Om. Igl è in bustab da la scrittira Devanagari ch'ins dovra per exempel per scriver hindi. Dapli dal hinduissem...

Budissem

Il budissem è naschì avant 2500 onns en l’India or dal hinduissem. En l’India datti dentant ozendi paucs che crain en il budissem. Ils budists vivan oravant tut en il Tibet, en la Tailanda, Sri Lanka, Corea, China e Giapun. Il Dharmachakra, la roda da la ductrina è il simbol per il budissem. Ils otg radis da la roda simboliseschan ils otg trutgs nobels. Dapli dal budissem...

Giudaissem

Il giudaissem è var 4000 onns vegl. La gronda part dals gidieus è repartida per l’entir mund enturn. Auter ch’en l’Israel, vivan els dapertut en minoritads. La gronda part da las persunas che vivan en l'Israel èn gidieus. Sin l’entir mund datti var 15 milliuns gidieus. La staila da David vala sco simbol dal temp modern per il giudaissem e per il pievel giudaic. Dapli dal giudaissem...

Artitgels legids il pli savens