Sch'ins vul far in viadi ord la Svizra en in'autra terra ston ins avair in pass. Quai è in cudischet, ed en quest cudischet èsi nudà differentas datas persunalas. Per exempel co ch'ins ha num, quant gronds ch'ins è, e plinavant chatt'ins en il pass era ina fotografia. Quai per ch'ins na possia betg cugliunar u duvrar il pass d'insatgi auter.
L'istoriga dal pass
Il pass datti gia daditg. Cumenzà hat tut l'onn 1380. Da quest temp aveva la glieud tema d'ina malsogna, da la pestilenza. Tut quels che vulevan vegnir a Venezia stuevan perquai avair ina brev. Uschia ha l'istorgia dal pass cumenzà.
L'entira via davent da la dumonda fin tar il nov pass svizzer
Sch'ins va en vacanzas en in'autra terra, lura dovra mintgin in document che demussa da tge pajais ch'el è. Per il solit è quai in pass. A partir da quest onn datti in nov pass svizzer. Il spezial vi da quest pass è ch'el cuntegna in chip cun differentas datas.
Il nov pass svizzer datti a partir dal prim da mars. Il chip integrà en il pass cuntegna differentas datas biometricas. Il pled biometric vegn dal grec ed è atgnamain dus pleds. Il pled bio e metric. Bio è in auter pled per vita, en noss cas in carstgaun. Ed il pled metric vul dir mesirar. Pia mesirar in carstgaun. Sco infurmaziun biometrica po vegnir duvrà tut quai che fa unic ina persuna. Per exempel la grondezza, ils egls u era la colur dals chavels. Cun il chip duai il pass vegnir pli segir, uschia ch'el na po betg vegnir sfalsifitgà. Quest chip fa dentant er ch'igl è pli cumplitgà da survegnir in pass.
Fixar in termin
En il chantun Grischun datti dus centers nua ch'ins po laschar far pass. In center sa chatta a Cuira e l'auter a Zernez. Per survegnir in pass èsi l'emprim da far la dumonda via telefon u internet. Il center sclerescha sch'ins è propi svizzer ed ha il dretg d'in pass svizzer. Pir lura vegni fixà in termin ed ins po ir sperasvi.
La visita
Tar la visita en il center vegni anc ina giada controllà l'identitad. Plinavant vegn il pass vegl marcà sco nunvalaivel. Quai cun far ina rusna. En in discurs vegni anc ina giada tschiffà e controllà las persunalias. Suenter vegni fatg ina fotografia, ina impronta dals dets ed ins sto suttascriver. Tut quellas datas vegnan messas sin il chip.
Ins na po betg prender cun sai ina fotografia. La raschun è che la fotografia fatga en il center sto vegnir scannada en in raster spezial. Quai per mesirar las differentas distanzas, per exempel tranter il nas e la bucca. Dals dus dets mussaders vegni fatg ina impronta. Tar ils uffants vegni fatg quai pir a partir da 12 onns.
Per ils uffants fin 7 onns suttascrivan ils geniturs. La suttascripziun vegn scritta sin in pitschen visur electronic.
Il postin porta il pass
La furniziun dal pass cuzza per ordinari duas emnas. Il pass vegn tramess per posta a chasa.
Guardar tge ch'è sin il chip
Mintga persuna ha la pussaivladad da controllar tut sias datas ch'èn sin il chip. Per quest intent èsi installà en mintga center, nua ch'ins po laschar far pass, in apparat per leger las datas dal chip.
Pers il pass
Sche vus perdais il pass stuais vus immediat annunziar quai a la polizia. Era sch'il pass n'è betg pli valaivel sto quai vegnir annunzià.
Il pass existent
Sch'insatgi ha anc in pass vegl na sto el betg immediat laschar far in pass nov. Il pass vegl resta valaivel fin la data da valaivladad. Questa data è nudada en il pass.