S’imaginar in enviern senza pudair ir cun scarsola ubain perfin cun skis è grev. Sch’i na dess betg ils chanuns naiv artifiziala, n’avessan intgins territoris da skis betg mintg'onn avunda naiv e stuessan serrar. Tuttina pretenda blera glieud ch’ins smettia da producir adina dapli naiv artifiziala. Pertge?
Dischavantatgs:
Forza electrica:
Ils chanuns da naiv han gronds ventilaturs che dovran electricitad. L’electricitad ch’ins dovra per far mo l’emprima cuverta da naiv en Svizra tanschess in entir onn per 1615 chasas. Mintga cuverta supplementara dovra alura puspè tuttina blera energia.
Aua:
Per producir naiv dovri natiralmain er aua – fitg blera aua. L’aua ch’ins dovra per far mo l’emprima cuverta da naiv en Svizra tanschess per 35000 chasas cun 6 abitantss in entir onn,ubain bunamain 6 onns per tut las chasas da la citad da Cuira. Era tar l’aua è quai mo per l’emprima cuverta. Aua ch’ins sto era l’emprim avair.
L’infrastructura:
Chanuns da naiv dovran pia massa aua. E per ch’ins haja quella immediat, cura ch’ins la dovra, èsi da bajegiar gronds lais sin las muntognas. Las lingias d’aua e d’electricitad ston vegnir installadas a l’ur da las pistas sut la terra. Quai munta gronds foss ed in lung temp, enfin che la natira po sa revegnir e puspè crescher pastg.
Avantatgs:
Ils giasts vegnan.
Segir il pli impurtant avantatg ed il motiv daco ch’ins fa naiv artifiziala è ch’ins po ir cun skis era cura ch’i na naiva betg a moda natirala giu da tschiel. Perquai vegnan mintg’enviern roschadas giasts. Els dovran ils hotels, las ustarias ed ils territoris da skis. Las plazzas per blera glieud èn uschia garantidas. Pia naiv artifiziala è ina garanzia ch’ins po segir ir cun skis.
Ina cuverta che protegia.
Las maschinas da pista ed ils urs dirs dals skis pon far donn al terren, sche la cuverta n`è betg grossa avunda. La naiv artifiziala è pli cumpacta, pli dira e po uschia proteger il terren.
