La grascha vegn schubregiada or da l’uigl e va sin ladimer. Da là metta il pur lura la grascha sin ils prads. Mo tge capita là cun la grascha e dastg’ins bittar tanta grascha sco ins vul sin ils prads?
Electricitad ord grascha
Far electricitad ord grascha, quai tuna curius. Mo sch’ins elavura la grascha endretg è quai pussaivel.
Laschain ina giada la grascha d’ina vart. Forsa avais vus magari da svidar per la mamma la sadella da cumpost e forsa avais era gia emblidà da far quai. Lura è la surpraisa magari gronda cura ch’ins avra la sadella. I toffa numnadamain sgarschaivel. Quai perquai ch’il cuntegn da la sadella ha gia cumenzà a smarschir ed igl ha dà in gas che toffa. Exact quest process vegn nizzegià tar il far electricitad ord grascha. Il product ch’i dat londerora è biogas.
Per far biogas dovr’ins per exempel puschina, grascha, rument da plantas u lavadiras. Quai vegn lura elavurà en in implant u ditg auter en ina fabrica da biogas.
Il maletg qua sut mussa co ch'ins fa electricitad cun biogas. Cliccai sin la grafica per guardar quella en furma pli gronda.
E dal reminent: quatter vatgas produceschan tanta grascha ch’i tanscha da far tanta electricitad sco quai ch’ina famiglia dovra.
Era en in zoo datti blera grascha
Far ord uigl – betg gist la lavur da siemi - mo ina lavur che mintga pur ha da far duas giada per di. Ina lavur che toffa en il vair senn dal pled. Mo questa lavur ston ins era far en auters lieus. Per exempel en in zoo. Gion Hosang è stà en in zoo ed ha guardà tar tge animals ch’i dat la pli blera grascha e sche quella grascha vegn era bittada ora sin ils prads.
