Zuppar e tschertgar stgazis
Dapi rodund 10 onns datti il "geocaching". Ina sort tschertgar e zuppar pitschens stgazis. Ins tschertga ils stgazis dentant betg be cun ina carta da stgazis però cun in apparat da GPS u in telefonin sco per exempel in “iPhone” (quel ha era la funcziun da GPS). Cun agid da coordinatas e descripziuns pon ins chattar sur 1 milliun “caches” sin tut il mund. Ins po dentant era zuppar sez in "cache". Nus mussain sco ch'ins fa quai.
Vus duvrais:
- Sco emprim stuais crear in conto sin la plattafurma “geocaching.com”
- In apparat da GPS (u sumegliant)
- pitschens stgazis
- in cueschet
- in rispli
- ina stgatla (p.ex. ina stgatla da plastic nua che nagina aua po en)
- il formular da las reglas dal gieu (chattais sin swissgeocach.ch)
- ed in bun lieu per zuppar il stgazi
En il “chace” stuais metter in pitschen palpiri cun scrit si il num dal cache, data e las coordinatas (il pitschen palpiri chattais sin swissgeocach.ch). Cura che vus avais preparà il “cache” pudais ir a zuppar el. En il lieu nua che vus vulais zuppar il stgazi stuais nudar las coordinatas cun agid da l’apparat da GPS. Las coordinatas, il num dal cache ed il lieu endatais sin la pagina geocaching.com. Ussa pon voss amis tschertgar voss stgazi.
Era vus pudais tschertgar in stgazi. Sin geocaching.com pudais vus endatar nua che vus vulais ir a tschertgar in. Cura che vus avais tscherni in stgazi pudais ir cun voss apparat da GPS sin via. Na betg emblidai ina pitschna chaussa per barattar cua che vus avais chattà il “cache”.