Siglir tar il cuntegn

Header

cuntegn

Recept Creflis en furma da stgilats

Quai è il recept preferì da Tamara Deflorin.

Far mams regorda mei mintgamai vid ils bials e legreivels temps da mia affonza. Ensemen cun miu figliol cuntinueschel jeu ussa questa biala tradiziun.
Autur: Tamara Deflorin scheffa communicaziun
Tamara Deflorin, scheffa communicaziun
Legenda: Tamara Deflorin, scheffa communicaziun RTR

Coier: 8 min.
Metter a frestg: 1 ura

Las ingredienzas per la pasta

  • 150 g paintg, temp. da stanza
  • 60 g zutger criv mieut
  • 50 g melassa
  • 1 ov
  • 250 g farina alva
  • 1 tp pulvra da cacau
  • 1 tp chanella
  • ½ tp pulvra da levon
  • 1 presa sal

Las ingredienzas per furmar

  • 20 nitscholas

Las ingredienzas per decorar

  • 1 alv d‘ov
  • 100 g pulvra da zutger
  • 50 g tschigulatta naira paletschada
  • 50 g tschigulatta naira luentada

tp = tschadun pitschen

Pass per pass

  1. Metter il paintg, il zutger ed la melassa en ina cuppa e maschadar bain cun il mixer a maun.
  2. Agiuntar l’ov e truschar, enfin che la massa è clera.
  3. Agiuntar la farina, il cacau, la chanella, la pulvra da levon ed il sal e truschar la massa ad ina pasta. Metter quella a frestg per in’ura.
  4. Purziunar la pasta e metter tranteren dus palpiris da furn per zullar ora la pasta sin ina grossezza da 4 mm.
  5. Furar or ils stgilats e metter quels sin ina lastra cuvrida cun in palpiri da furn.
  6. Smatgar sin mintga stgilat ina nitschola e metter anc ina giada a frestg (15 min).
  7. Suenter coier ils creflis ca. 8 min. entamez il furn prestgaudà sin 200°C chalira sura/sut.

Decorar
Truschar l’alv d’ov cun uschè blera pulvra da zutger, enfin ch’i dat ina glasura spessa. Metter la glasura en in satg da garnir e malegiar ils egls ed ils venters sin ils stgilats.
Cura ch’ils egls ed ils venters en sitgs, metter la tschigulatta luentada en in satg da garnir ed ornar las cuas ed ils egls dals stgilats.
A la fin: Reparter las splanadiras da tschigulatta sin ils biscuits.

Artitgels legids il pli savens