Siglir tar il cuntegn

Header

audio
Tour de ski: Finanziaziun garantida - er senza Val Müstair ed Engiadina Bassa
Or da Actualitad dals 23.11.2022.
laschar ir. Durada: 3 minutas 16 Secundas.
cuntegn

Val Müstair La finanziaziun dal Tour de ski è garantida

Gia per la sisavla giada organisescha la Val Müstair etappas dal Tour de ski. Quest enviern han las etappas lieu ils 31 da december e da Bumaun. La finanziaziun da las cursas è garantida era senza il sustegn da la vischnanca e da la Regiun Engiadina Bassa / Val Müstair.

La Val Müstair ha ina gronda experientscha en l’organisaziun d'etappas dal Tour de ski. Gia dapi il 2013 organisescha la Val Müstair etappas da la seria da cursas che finescha l’entschatta da schaner cun la enconuschenta muntada sin l’Alpe Cermis en il Trentino. Suenter divers onns organiseschan il jauers uss dentant las cursas per l’emprima giada senza l’agid finanzial da la vischnanca da la Val Müstair e da la Regiun Engiadina Bassa/Val Müstair. Era senza quest sustegn è la finanziaziun da las cursas garantida.

audio
La finanziaziun dal Tour de ski en Val Müstair è garantida
ord Actualitad dals 23.11.2022.
laschar ir. Durada: 3 minutas 16 Secundas.

Retratg la dumonda da sustegn tar la vischnanca

Sco adina fin uss han ils organisaturs da las cursas dal Tour de ski en Val Müstair dumandà er questa primavaira per in sustegn finanzial tar la vischnanca da la Val Müstair. Fin uss sa participava la vischnanca cun radund 300’000 francs a las cursas a Tschierv. Tenor ils organisaturs da las cursas na ha la vischnanca però fatg enavant. La stad alura, cura che la vischnanca n’aveva anc betg decidì en chaussa, han ils organisaturs retratg la dumonda. Quai cun la consequenza che i na vegn uschia er betg a dar daners per l’eveniment da la Regiun Engiadina Bassa/Val Müstair. La Regiun aveva fin uss er adina sustegnì l’eveniment sportiv cun radund 80’000 francs. En ils statuts da la Regiun è definì che la Regiun sustegna be arranschaments che vegnan er sustegnids da la vischnanca.

La dumonda tar la vischnanca è vegnida tratga a la lunga, ed a la lunga. A la fin avain nus decis da betg spetgar sin ina decisiun, mobain da retrair la dumonda.
Autur: Guido Mittner president dal Tour de ski en Val Müstair

Cumpensà la perdita d’entradas cun sponsurs e donaturs

Sin in sfratg mancavan al comité d’organisaziun da las cursas dal Tour de ski stgars 400’000 francs. Per tuttina savair garantir las cursas han els pervia da quai dumandà tar sponsurs e donaturs. Quels han augmentà lur participaziun ed han emplenì la fora. Las cursas èn uschia garantidas. Per il futur speran ins che las cursas dal Tour de ski restan en Val Müstair. Decis, ni perfin suttascrit na è dentant anc nagut.

RTR actualitad 17:00

Artitgels legids il pli savens

Scrollar a sanestra Scrollar a dretga