Siglir tar il cuntegn

Header

Senza arbiter nagin ballape
Legenda: Senza arbiter nagin ballape RTR
cuntegn

US Rueun In arbiter-asilant salva il nov campiunadi

Senza arbiter nagin ballape. La tschertga lascha vegnir als cunfins. Uschia era il club da la 5avla liga da Rueun. Suenter passa dus onns tschertgà ed insaquant obstachel è uss in giuven asilant da l'Iran lur arbiter uffizial.

In club da ballape dovra en sias retschas in arbiter. N'è quai betg il cass, vegn il club baud ni tard exclus dal campiunadi. Quai la regla. E quai scenari ha schmanatschà al club sursilvan da 5avla liga, l'Uniun Sportiva Rueun. La varianta da surpigliar in arbiter dad in auter club ch'era en sa sez sin buna via ha fatg naufragi pervia da tests da cundiziun che l'um da 60 onns n'ha betg dumagnà. Sur plirs chantuns e quasi per schabetg ha il club udì dad Amir Mohebbi. In giuven asilant ch'è arrivà avant 5 onns da l'Iran en Svizra, a Cuira. En sia patria giugava el ballape. Ed era sche Amir n'enconuscha betg il club da Rueun e ses giugadurs ha el mussà interess da far tras il club la scolaziun d'arbiter. Ins era da buna speranza che quai grategi.

Primavaira era el annunzià per ils curs da l'Associaziun da ballape da la Svizra orientala OFV. Cunquai che quels èn en il Principadi dal Liechtenstein n'ha Amir Mohebbi betg pudì far els. Cun il status d'asilant en Svizra, ir sur cunfin, chaussa na pussaivla. Dentant eri stad e l'US Rueun ha gugent u navidas stuì far patratgs davart il scenari ch'il nov campiunadi da ballape cumenza senza il club ch'ha ina lunga tradiziun (fundà l'onn 1948).

audio
US Rueun e ses arbiter asilant
04:10 min, Actualitad dals 23.09.2021.
laschar ir. Durada: 04:10 minutas.

Suenter blers contacts e telefons ha l'Associaziun da ballape da la Svizra orientala mussà chapientscha per la situaziun dals da Rueun e lur arbiter-asilant. Amir Mohebbi ha pudì ir a Turitg e far la scolaziun d'arbiter tar l'Associaziun da ballape turitgaisa. Quella ha el entant dumagnà e terminà e l'ultima fin d'emna ha el gì premiera. El ha tschivlà ses emprim gieu. In dals C-juniors a Schluein.

RTR actualitad 11:00

Artitgels legids il pli savens

Scrollar a sanestra Scrollar a dretga