Siglir tar il cuntegn

Header

audio
Tour de Ski – 1. etappa a Lai: nagin «happy end» per ils Svizzers
Or da Actualitad dals 28.12.2021.
laschar ir. Durada: 4 minutas 19 Secundas.
cuntegn

Tour de Ski – 1. etappa a Lai Nagin «happy end» per ils Svizzers

Roman Furger e Valerio Grond èn ils sulets Svizzers che dastgan esser cuntent cun l’emprima etappa dal Tour de Ski, in sprint en il stil liber a Lai. Omadus han cuntanschì ils mezfinals a questa cursa a chasa.

En il mezfinal n’han tant Roman Furger sco er Valerio Grond da Tavau gì nagina schanza da sa qualifitgar per il final cun ils megliers sis. Gia en il quartfinal è la cursa stada a fin per il quartet svizzer cun Jovian Hediger, Roman Schaad, Erwan Käser e Janik Riebli.

Gì nagina schanza da sa qualifitgar per ils finals han ils dus Rumantschs Dario Cologna e Jonas Baumann. Tar Cologna na stat dentant betg il classament general pli en il center. El vul dentant procurar per in u l’auter bun resultat en las etappas da distanza per uschia er survegnir in bun sentiment en vista als gieus olimpics. Dario Cologna ch’ha gudagnà quatter giadas il Tour de Ski, quai che munta record, èsi il 14avel e davos Tour de Ski da sia carriera.

Dario Cologna
Legenda: Dario Cologna ha lantschà a Lai ses 14avel e davos Tour de Ski. Keystone

Gudagnà il sprint ha a moda suverana il grond favurit norvegiais Johannes Hösflot Kläbo. El ha triumfà avant ils dus Franzos Richard Jouve e Lucas Chanavat.

Discletg per Fähndrich e van der Graaff

In sprint d’emblidar èsi stà per las duas Svizras Nadine Fähndrich e Laurien van der Graaff. Quai malgrà ch’ellas han persvadì en la qualificaziun. Fähndrich è schizunt stada la pli sperta en il prolog. En il quartfinal è la Lucernaisa dentant cupitgada ed ha uschia stuì sutterrar gia baud ina plazza da podest avant ils fans a chasa. A Laurien van der Graaff, ch’è partida en ses davos sprint da la cuppa mundiala en Svizra, ha in sulet tschientavel mancà per pudair sa qualifitgar per il mezfinal.

video
Fähndrich perda l'equiliber e cupitga
Or da Sport-Clip dals 28.12.2021.
laschar ir. Durada: 36 Secundas.

Gudagnà il sprint da las dunnas ha l’Americana Jessie Diggins avant la Norvegiaisa Mathilde Myhrvold e la Slovena Anamarija Lampic.

I spetga la 2. etappa a Lai

La mesemna, ils 29-12, spetga a Lai la segunda etappa dal Tour de Ski – ina cursa da distanza. Tar las dunnas stat sin il program ina cursa da 10 kilometers, tar ils umens ina cursa da 15 kilometers. Currì vegn en il stil classic.

RTR novitads 14:00 +

Artitgels legids il pli savens