Siglir tar il cuntegn

Header

audio
Proxima destinaziun Giapun – tips per viagiar
Or da Actualitad dals 06.08.2021.
laschar ir. Durada: 6 minutas 28 Secundas.
cuntegn

Tokio 2020 Proxima destinaziun Giapun

Gust da visitar il pajais dal sulegl levant? Nus dain a vus intgins tips per sa preparar sin voss viadi en in mund ch'è propi in zic 'different'.

Linguatg

Era sche bleras giapunaisas e blers giapunais en las citads discurran in zic englais èsi da grond avantatg da savair in per pleds giapunais. Cun konnichiwa, arigato e sumimasen pon ins sper rumper il glatsch ed uschia vegnir en contact cun la populaziun locala.

Daners

Bancnotas da 10'000 yen
Legenda: Keystone

Malgrà ch’il Giapun è in pajais fitg modern èsi surprendent quant savens ch’ins dovra en il mintgadi anc daners bluts. Bleras ustarias u stizuns pitschnas acceptan anc adina naginas cartas da credit. Igl è perquai impurtant da prender avunda yen sin il viadi.

Ina moda e maniera alternativa tar il daner blut èn las cartas per pajar ils viadis cun la metro. Cun quellas pon ins era pajar en ils pli blers ‘conbinis’, pitschnas stizuns ch’èn da chattar dapertut, u era tar automats ch'i dat en mintga chantun. 

Electricitad

bischla da contact per il Giapun
Legenda: Adrian Camartin

Chargiar il telefonin u duvrar il barschun da dents electric? Lura duvrais vus in adapter per la bischla da contact. En il Giapun sumeglian quellas a las bischlas ch’i dat en ils Stadis Unids. Impurtant è plinavant che l’apparat è cumpatibel cun la tensiun electrica ch’è cun 110 volt pli bassa che quella en Svizra (230 volt). Sche vus duvrais ils pitschens transfurmaturs lura èn quels il pli savens cumpatibels, i cuzza simplamain dubel uschè ditg enfin che l’accu è chargià.  

Karaoke

Gruppa che conta karaoke
Legenda: Keystone

Ina visita en in local da karaoke tutga simplamain tar in viadi en il Giapun. Perquai in pitschen tip. Faschai gia a chasa ina glista cun intginas chanzuns che vus conuschais e da las qualas vus essas segirs che vus enconuschais era la melodia. Il meglier classichers sco ‘Go West’ dals Pet Shop Boys, ‘Take on me’ da A-Ha ni ‘I Wanna Dance with Somebody’ da Whitney Houston. Uschia è ina saira divertenta garantida e vus pudais impressiunar cun voss chant e prestaziun.

Tualettas

Telecumond dad ina tualetta giapunaisa
Legenda: Per laschar ir l'aua il meglier smatgar il buttun cun il segn 大 sisum sanester. Chris 73

En il Giapun èn las tualettas veritabels indriz da high-tech. Tup mo sch’ils buttuns portan mo segns giapunais. Perquai il meglier nudar ni squitschar in pitschen cedel cun ils pli impurtants segns. Betg che vus smatgais sin il fauss buttun e vegnis tut bletschs.

 

RTR actualitad 11:00

Artitgels legids il pli savens