Nino Schurter stat avant sia quarta cursa olimpica. El sa pia tge che spetga sin el ed el sa er co ir enturn cun l’entira situaziun. L’experientscha dals davos 10, 15 onns pudessi gidar Schurter da far in’ulteriura giada il pass sin il podest olimpic, uschia l’expert e ses schef d’equipa Thomas Frischknecht. Dasper saja er il percurs da cursa insatge che vegn encunter a Nino Schurter, sco er il clima. Il mountainbiker oriund da Tersnaus è in ch’ha gugent il chaud ed a Tokio regia il mument temperaturas sur 30 grads cun in’umiditad da bun 95%.
Plinavant po Nino Schurter ir a la partenza senza pli grond squitsch. Quel han auters, en spezial l’Ollandais Mathieu van der Poel che vul per tut pretsch gudagnar aur olimpic en il mountainbike sco er il Svizzer Mathias Flückiger ch’ha dominà las davosas cursas da la cuppa mundiala en questa stagiun.